ئىسرائىلىيەدە چىقىدىغان «Yedioth Ahronoth» گېزىتى ئىسرائىلىيە باش ئىشتابىدىكى بىر ئەمەلدارنىڭ سۆزلىرىنى نەقىل كەلتۈرۈپ خەۋەر قىلىشىچە، ئىسرائىلىيە ئارمىيەسى ئىران ۋە ئۇنىڭ رايوندىكى ۋاكالەتچى كۈچلىرى بىلەن يۈز بېرىدىغان ئۇرۇشنىڭ كەم دېگەندە بىر ئاي داۋاملىشىش سېنارىيەسىگە ئاساسەن تەييارلىق كۆرمەكتە ئىكەن.
مەزكۇر ئەمەلدار ئىسرائىلىيە ھەربىي رەھبەرلىكىنىڭ كەلگۈسىدىكى ۋەزىيەت ئۆزگىرىشلىرى ۋە ئالدىمىزدىكى مەزگىلدە توقۇنۇشلارنىڭ تېخىمۇ كېڭىيىش ئېھتىماللىقىنى نەزەردە تۇتۇپ، ھەرقايسى قىسىملارنىڭ جەڭگە تەييار تۇرۇش ئىقتىدارىنى يۇقىرى كۆتۈرگەنلىكىنى ئېيتتى. ئۇ يەنە بۇ تەييارلىقلارنىڭ ھاۋا مۇداپىئە كۈچلىرىنى كۈچەيتىش، قوشۇمچە قىسىملارنى مۇھىم نۇقتىلارغا ئورۇنلاشتۇرۇش ۋە نۆۋەتتىكى توقۇنۇشلار داۋاملاشقان ياكى باشقا سېپلەرگە كېڭەيگەن تەقدىردە، ئۇزۇن مۇددەتلىك ھەربىي ھەرىكەتلەرنى ئېلىپ بېرىشقا تولۇق تەييار تۇرۇشنى ئۆز ئىچىگە ئالىدىغانلىقىنى سۆزلىرىگە ئىلاۋە قىلدى.
بۇ باياناتلار رايون ۋەزىيىتى مىسلى كۆرۈلمىگەن دەرىجىدە كەسكىنلىشىۋاتقان، ئىسرائىلىيە بىلەن ئىران ئوتتۇرىسىدا ئۆزئارا ھۇجۇملار داۋاملىشىۋاتقان ۋە بىر قانچە ئالدىنقى سەپتە خەۋپسىزلىك جىددىيچىلىكى ئەۋجىگە چىققان بىر پەيتتە ئېلان قىلىندى.
سىياسىي كۆزەتكۈچىلەر ئىسرائىلىيە ئارمىيەسىنىڭ نىسبەتەن ئۇزۇن داۋاملىشىشى مۇمكىن بولغان بىر ئۇرۇشقا تەييارلىق قىلىشنى تەكىتلىشى، نۆۋەتتىكى توقۇنۇشلارنىڭ بىرنەچچە ھەپتە ياكى ئۇنىڭدىنمۇ ئۇزۇن داۋاملىشىدىغان تېخىمۇ كەڭ كۆلەملىك رايون خاراكتېرلىك ئۇرۇشقا ئايلىنىپ كېتىشىگە دائىر ئەندىشىلەرنى ئەكس ئەتتۈرىدىغانلىقىنى قەيت قىلىشماقتا.
