ۋاشىنگتوننىڭ موسكۋا ئۈستىدىكى دىپلوماتىك بېسىمنى كۈچەيتكەن بىر مەزگىلدە دۇنيا سەھىيە تەشكىلاتى، سىبىرىيەدىكى بىر ۋابا تەتقىقات ئورگىنىدا بىر تەجرىبىخانا تېخنىك خادىمىنىڭ ھاياتىدىن ئايرىلىشىنىڭ ئارقىسىدىن روسىيەگە تولۇق ئوچۇق يورۇقلۇققا كاپالەتلىك قىلىش چاقىرىقى قىلدى.
دۇنيا سەھىيە تەشكىلاتىنىڭ باش دىرېكتورى تېدروس ئادخانوم غەبرەيېسۇس: «زىددىيەتلىك دوكلاتلارنى ئايدىڭلاشتۇرۇش ۋە يوشۇرۇن خەلق سالامەتلىكى خەتەرلىرىنىڭ توغرا بىر شەكىلدە باھالىنىشىغا كاپالەتلىك قىلىش ئۈچۈن خەلقئارا سەھىيە تۈزۈمى دائىرىسىدە ۋاقتىدا، تولۇق ۋە ئوچۇق يورۇق ئۇچۇر ھەمبەھىرلەش ھالقىلىق ئەھمىيەتكە ئىگە» دېگەن سۆزلەرنى ئىشلەتتى.
ئامېرىكا پىرېزىدېنتى دونالد ترامپمۇ ئاقسارايدا ئېلان قىلغان باياناتىدا، تىلغا ئېلىنغان ۋەقەنى بىۋاسىتە روسىيە پىرېزىدېنتى ۋىلادىمىر پۇتىن بىلەن مۇزاكىرە قىلىدىغانلىقىنى جەزملەشتۈردى.
ژۇرنالىستلارغا: «ھە، پىلانلانغان بىر كۆرۈشۈشۈم بار» دېگەن ترامپ، كۆرۈشۈشنىڭ «ناھايىتى يېقىندا» ئىشقا ئاشىدىغانلىقىنى بىلدۈردى.
زىددىيەتلىك ئۇچۇرلار
روسىيەنىڭ مۇستەقىل خەۋەر ئاگېنتلىقى «People of Baikal» نىڭ خەۋەر قىلىشىچە، سىبىرىيە ۋە يىراق شەرق ئىركۇتسك ۋابا بىلەن كۈرەش قىلىش تەتقىقات ئورنىدا 28 ياشلىق تېخنىك دەريا شىپىلوۋا كېسەللىك قوزغاتقۇچى خاراكتېرلىك بىر تەجرىبە تۇرۇبىسىنى چۈشۈرۈۋەتكەن. ئۇنىڭ ئۆپكە ياللۇغى ۋاباسىغا گىرىپتار بولغانلىقى ۋە ئۇنىڭ بىلەن ئالاقىدە بولغان 200 گە يېقىن كىشىنىڭ كارانتىنغا ئېلىنغانلىقى بىلدۈرۈلگەن.
روسىيە دائىرىلىرى، ئۆلگەندىن كېيىن ئېلىپ بېرىلغان ئانالىزلارنىڭ شىپىلوۋانىڭ خىزمىتى بىلەن باغلانغان ھەرقانداق بىر كېسەللىك قوزغاتقۇچى باكتېرىيەگە ئىشارەت قىلمىغانلىقىنى ئىلگىرى سۈرۈپ، بۇ خەۋەرلەرنى قەتئىي رەت قىلدى.
ئۆپكە ياللۇغى ۋاباسى، داۋالانمىغان تەقدىردە نەپەس ئېلىش سىستېمىسى كەمچىللىكى ۋە ئۆلۈمگە سەۋەب بولىدىغان، باكتېرىيەلىك يۇقۇملىنىشنىڭ ئەڭ خەتەرلىك ۋە يۇقۇملۇق تۈرى ھېسابلىنىدۇ.
