ئامېرىكا تاشقى ئىشلار مىنىستىرى ئانتونى بىلىنكېن رۇسىيەنىڭ شىمالىي كورېيەگە قورال-ياراغ ۋە ئۈسكۈنىلەر ياردىمى ئېلىش بەدىلىگە، ئىغار ئالەم بوشلۇقى ۋە سۈنئىي ھەمراھ تېخنىكىلىرىنى بەرمەكچى بولۇۋاتقانلىقىنى بىلدۈردى.
يونخاپ ئاگېنتلىقىنىڭ خەۋىرىگە قارىغاندا، ئانتونى بىلىنكېن پايتەخت سېئۇلنى زىيارەت قىلىش جەريانىدا جەنۇبىي كورېيە تاشقى ئىشلار مىنىستىرى چو تائې-يۇل بىلەن كۆرۈشكەندىن كېيىن ئۆتكۈزۈلگەن قوشما مۇخبىرلارنى كۈتۈۋېلىش يىغىنىدا سۆز قىلىپ، يېقىنقى مەزگىللەردە كۈچىيىشكە يۈزلەنگەن شىمالىي كورېيە-رۇسىيە ھەربىي ھەمكارلىقنىڭ ئەندىشە پەيدا قىلغانلىقىنى ئوتتۇرىغا قويغان.
ئۇ رۇسىيەنىڭ ئىلغار ئالەم بوشلۇقى ۋە سۈنئىي ھەمراھ تېخنىكىسى بىلەن تەمىنلەش بەدىلىگە پيوڭياڭدىن قورال-ياراغ ۋە ئۈسكۈنە ياردىمى ئالماقچى بولۇۋاتقانلىقىنى تىلغا ئېلىپ: «رۇسىيە پىرېزىدېنتى ۋىلادىمىر پۇتىن دۆلىتىنىڭ ئون يىللاردىن بۇيان قوللىنىپ كېلىۋاتقان سىياسىتىنى ئەكسىچە يۆنىلىشكە بۇراپ، شىمالىي كورېيەنىڭ يادرو قورال پىروگراممىسىنى قوبۇل قىلىشقا يېقىنلىشىۋاتقانلىقىغا ئىشىنىشىمىز ئۈچۈن سەۋەبلىرىمىز بار» دېگەن.
مەزكۇر ئەندىشىنىڭ جەنۇبىي كورېيە ۋە ياپونىيە ئۈچۈنمۇ كۈچلۈك دىققەت نۇقتىسى بولۇۋاتقانلىقىنى قەيت قىلغان بىلىنكېن، توكيو بىلەن سېئۇلنىڭ ئامېرىكا بىلەن شەكىللەندۈرگەن ئۈچ تەرەپلىك بىخەتەرلىك ھەمكارلىقىنىڭ مۇھىملىقىنى تەكىتلىگەن.
ئۇ ۋاشىنگتون-سېئۇل ئىتتىپاقىنىڭ شەرقىي شىمالىي ئاسىيا ۋە ھىندى-تىنچ ئوكيان رايونلىرىدا «تىنچلىق، بىخەتەرلىك ۋە گۈللىنىشنىڭ ئۇل تېشى» ئىكەنلىكىنى ئېيتقان.
تەخمىنەن 12 مىڭ شىمالىي كورېيەلىك ھەربىينىڭ رۇسىيە ئەسكەرلىرى بىلەن بىرلىكتە ئۇكرائىناغا قارشى ئۇرۇش قىلىش ئۈچۈن رۇسىيەدىكى ئۇرۇش سەپلىرىگە ئەۋەتىلگەنلىكى مۆلچەرلەنمەكتە.
موسكۋا ۋە پىيوڭياڭ مۇناسىۋەتلىرى
رۇسىيە تاشقى ئىشلار مىنىستىرلىقى 2024-يىل 6-ئايدا موسكۋا بىلەن پىيوڭياڭ ئوتتۇرىسىدا ئىمزالانغان ئومۇميۈزلۈك ئىستراتېگىيەلىك شېرىكلىك كېلىشىمىنىڭ 2024-يىل 12-ئايدا كۈچكە ئىگە بولغانلىقىنى جاكارلىغانىدى.
بۇ كېلىشىمنىڭ تەرەپلەردىن بىرى ھۇجۇمغا ئۇچرىغاندا ئۆزئارا ھەربىي ياردەملىشىشنى مەزمۇن قىلىدىغانلىقى، شەرقىي شىمالىي ئاسىيا ۋە ئاسىيا-تىنچ ئوكيان رايونلىرىدا بۆلۈنمەس بىخەتەرلىك سىستېمىسى ۋە كۆپ قۇتۇپلۇق دۇنيا تەرتىپىنىڭ بەرپا قىلىنىشىغا تۆھپە قوشىدىغانلىقى قەيت قىلىنغانىدى.
