خىتاينىڭ تاجىكىستاننىڭ پايتەختى دۈشەنبەدە تۇرۇشلۇق ئەلچىخانىسى جۈمە كۈنى بايانات ئېلان قىلىپ، تاجىكىستاننىڭ ئافغانىستان بىلەن بولغان چېگرا رايونىدا يۈز بەرگەن قوراللىق ھۇجۇم نەتىجىسىدە ئۈچ نەپەر خىتاي پۇقراسىنىڭ ھاياتىدىن ئايرىلغانلىقىنى دەلىللىدى.
چارشەنبە كۈنى مەزكۇر دۆلەتنىڭ غەربىي جەنۇبىدىكى خاتلون ۋىلايىتىدە يۈز بەرگەن بۇ ھۇجۇمدا، يەنە بىر خىتاي پۇقراسىنىڭ يارىلانغانلىقىنى بىلدۈرگەن خىتاي ئەلچىخانىسى، ئۆز پۇقرالىرىنى چېگرا رايونىدىن دەرھال ئايرىلىشقا چاقىردى.
ھۇجۇمچىلارنىڭ كىملىكى ئاشكارىلانمىغان بولسىمۇ، ئەمما خىتاي تەرەپنىڭ تاجىكىستاندىن ۋەقە ئۈستىدىن تەكشۈرۈش ئېلىپ بېرىشنى تەلەپ قىلغانلىقى قەيت قىلىندى.
تاجىكىستان تاشقى ئىشلار مىنىستىرلىقى پەيشەنبە كۈنى ئېلان قىلغان باياناتىدا، قازا قىلغان ئۈچ كىشىنىڭ ھۇجۇم نىشانى قىلىنغان «LLC Shahin SM» شىركىتىنىڭ خىزمەتچىلىرى ئىكەنلىكىنى ئوتتۇرىغا قويدى.
خەۋەردە، ئافغانىستان تەرەپتىن قىلىنغان ھۇجۇمدا قول بومبىسى قاچىلانغان بىر ئۇچقۇچىسىز ھاۋا ئاپپاراتىنىڭ ئىشلىتىلگەنلىكىمۇ تەكىتلەندى.
ئافغانىستان تاشقى ئىشلار مىنىستىرلىقى باياناتىدا: «بۇ ۋەقەگە چېتىشلىقى بار گۇرۇپپا — رايوندا قالايمىقانچىلىق، مۇقىمسىزلىق ۋە بىخەتەرلىك ئەندىشىسى پەيدا قىلىشقا ئۇرۇنۇۋاتقان بىر گۇرۇپپىدۇر» دېگەن بولسىمۇ، ئەمما مەزكۇر گۇرۇپپىنىڭ نامىنى ئاشكارىلىمىدى.
مىنىستىرلىق يەنە، كابۇل ھۆكۈمىتىنىڭ دەسلەپكى تەكشۈرۈش-باھالاش خىزمەتلىرىنى ئىشلىگەنلىكىنى ۋە بۇ مەسىلىدە تاجىكىستان بىلەن تولۇق ھەمكارلىشىدىغانلىقىنى قەيت قىلدى.
