تۈركىيە بىلەن ئەرەب بىرلەشمە خەلىپىلىكى ئوتتۇرىسىدىكى ئافرىقا سۆھبەتلىرىنىڭ ئىككىنچى نۆۋەتلىكى دۈشەنبە كۈنى ئەبۇدابىدە ئۆتكۈزۈلىدۇ. تۈركىيە جۇمھۇرىيىتى تاشقى ئىشلار مىنىستىرلىقى يىغىننىڭ ئېچىلىدىغانلىقىنى جەزملەشتۈردى.
سۆھبەتكە تۈركىيەگە ۋاكالىتەن تۈركىيە جۇمھۇرىيىتى تاشقى ئىشلار مىنىستىرلىقىنىڭ مۇئاۋى مىنىستىرى بۇرھانەتتىن دۇران بىلەن ئەرەب بىرلەشمە خەلىپىلىكىگە ۋاكالىتەن ئەرەب بىرلەشمە خەلىپىلىكىنىڭ تاشقى ئىشلارغا مەسئۇل دۆلەت ئىشلىرى مىنىستىرى شاھبۇت بىن نەھيان ئال نەھيان بىرلىكتە رىياسەتچىلىك قىلىدۇ.
سۆھبەتلەردە ئافرىقادىكى ئەڭ يېڭى ئۆزگىرىشلەر بىلەن بىر ۋاقىتتا، قىتئە مىقياسىدا بولۇپمۇ ئىقتىساد ۋە مەبلەغ سېلىش جەھەتتە ھەمكارلىشىش مۇمكىنچىلىكى بولغان ساھەلەر مۇزاكىرە قىلىنىدۇ.
ئافرىقا مەسىلىسى ھەققىدە دائىملىق كېڭەش ئۆتكۈزۈش قارارى، جۇمھۇر رەئىس رەجەپ تاييىپ ئەردوغاننىڭ 2022-يىلى فېۋرالدا ئەرەب بىرلەشمە خەلىپىلىكىدە ئېلىپ بارغان زىيارىتى جەريانىدا، ئىككى دۆلەت تاشقى ئىشلار مىنىستىرلىرى ئوتتۇرىسىدا ئۆتكۈزۈلگەن ئۇچرىشىشتا ئېلىنغانىدى.
بۇ قارارغا ئاساسەن، تۈركىيە بىلەن ئەرەب بىرلەشمە خەلىپىلىكى ئوتتۇرىسىدىكى تۇنجى قېتىملىق ئافرىقا كېڭەش يىغىنى 2023-يىلى 10-ئۆكتەبىردە ئەنقەرەدە ئۆتكۈزۈلگەنىدى.
