ئۇكرائىنا پىرېزىدېنتى ۋولودىمىر زېلېنسكىي، ئىجتىمائىي تاراتقۇ ھېسابىدا ھەمبەھىرىلىگەن باياناتىدا، رۇسىيە-ئۇكرائىنا ئۇرۇشى توغرىسىدا مۇخبىرلارنىڭ سوئاللىرىغا جاۋاب بەرگەنلىكىنى بىلدۈرۈپ، دۆلىتى ئۈچۈن ئەڭ ئېنىق خەۋپسىزلىك كاپالىتىنىڭ ناتوغا ئەزا بولۇش ئىكەنلىكىنى ۋە بۇنى ئىتتىپاقداش دۆلەتلەرنىڭمۇ چۈشىنىدىغانلىقىنى ئىپادىلىدى.
گېرمانىيەنىڭ پايتەختى بېرلىندا 19-نويابىر ئۆتكۈزۈلگەن «پىدائىيلار كوالىتسىيەسى» يىغىنىدا ئۇكرائىنانىڭ ناتو بىلەن بىر گەۋدىلىشىش مۇساپىسىنىڭمۇ مۇزاكىرە قىلىنغانلىقىنى بىلدۈرگەن زېلېنسكىي، ئۇكرائىنانىڭ ناتوغا ئەزا بولغان تەقدىردە ئىتتىپاقنىڭ تېخىمۇ كۈچىيىدىغانلىقىنى ئىلگىرى سۈردى.
زاپوروژىيە ۋە خېرسون رايونلىرىدا پۇقرالارنى تارقاقلاشتۇرۇش تىزىملىكلىرى تۈزۈلدى
زېلېنسكىي، ئامېرىكا پىرېزىدېنتى دونالد تىرامپنىڭ رەپىقىسى مېلانىيا تىرامپنىڭ قوللىشى بىلەن ئۆكتەبىر ئېيىدا رۇسىيە قانۇنسىز قوشۇۋالغان خېرسون رايونىدىكى ئولېشكى شەھىرىدە ئىنسانپەرۋەرلىك ھەرىكىتىنىڭ ئېلىپ بېرىلغانلىقىنى ئەسلىتىپ، ئامېرىكا تەرەپكە رەھمەت ئېيتتى. ئۇ يەنە ئۇكرائىنا ئارمىيەسىنىڭ ۋەكىللىرى بىلەن ئوخشىمىغان ئولتۇراق رايونلىرىدىكى پۇقرالارنى تارقاقلاشتۇرۇش ئۈچۈن يېڭى تىزىملىكلەرنى تۈزگەنلىكىنى بىلدۈردى.
پۇتىن باشلىقلار يىغىنىدا كۈتكەن نەتىجىگە ئېرىشەلمىدى
ئامېرىكا، خىتاي ۋە رۇسىيە رەھبەرلىرىنىڭ خىتايدا ئۆتكۈزگەن باشلىقلار يىغىنى ئۈستىدىمۇ توختالغان زېلېنسكىي: «بۇ ئۈچ تەرەپلىك باشلىقلار يىغىنىنىڭ رۇسىيە نۇقتىسىدىن ناھايىتى مەغلۇبىيەتلىك بولغانلىقىنى ئويلايمەن. ھەممىدىن ئاۋۋال ھازىرقى ئەھۋال بىر ‹يالتا كونفېرانسى› ئەمەس ئىدى. پۇتىن دۇنيانى قايتا بۆلۈشۈش ۋە چېگرالارنى ئۆزگەرتىش مەنىسىدە ھەقىقىي بىر يالتانى خالامتى؟ شۇنداق. ئەمما خىتاي ئۆزىنىڭ بۇ ئىشقا سۆرەپ كىرىلىشىگە يول قويمىدى. ئامېرىكا بىلەن رۇسىيە ئوتتۇرىسىدا ئىككى تەرەپلىك شەكىلدە نېمىلەرنىڭ يۈز بەرگەنلىكىنى بىلمەيمەن، ئەمما تېما ئۇكرائىنا ئەمەس ئىدى. دېمەك، چېگرالارنى ئۆزگەرتىش ئەمەلگە ئاشمىدى» دېدى.













