قىرغىزىستاندا تەتقىق قىلىپ ياساپ چىقىلغان تۇنجى مىللىي سۈنئىي ھەمراھ ئالەم بوشلۇقىغا قويۇپ بېرىلدى. قىرغىزىستان پىرېزىدېنت مەھكىمىسى ئاخبارات مەركىزىنىڭ ئېلان قىلغان باياناتىغا ئاساسلانغاندا، تۇنجى مىللىي سۈنئىي ھەمراھ ئامېرىكانىڭ كالىفورنىيە ئىشتاتىدىكى ۋاندېنبېرگ ھاۋا ئارمىيە بازىسىدىن SpaceX Falcon 9 راكېتاسى ئارقىلىق ئالەم بوشلۇقىغا قويۇپ بېرىلگەن.

ئامېرىكادا خىزمەت زىيارىتىدە بولۇۋاتقان قىرغىزىستان پىرېزىدېنتى سادىر جاپپاروۋ سۈنئىي ھەمراھنى قويۇپ بېرىش مۇراسىمىغا قاتنىشىپ، بۇ تارىخىي دەقىقىلەرگە شاھىت بولدى. ئەرەب بىرلەشمە خەلىپىلىكى بىلەن ئورتاقلىشىپ تەتقىق قىلىپ ياساپ چىقىلغان بۇ تۇنجى مىللىي سۈنئىي ھەمراھنىڭ، قىرغىزىستان ئىقتىسادى ۋە مۇھىت كۆزىتىش جەھەتتە مۇھىم رول ئوينايدىغانلىقى بىلدۈرۈلدى.

مەزكۇر سۈنئىي ھەمراھ دېھقانچىلىق مەيدانلىرى ۋە يايلاقلارنىڭ ئەھۋالىنى، قۇرغاقچىلىق خەۋپىنى ۋە يېزا ئىگىلىك مەھسۇلاتلىرىنىڭ ھوسۇلدارلىقىنى كۆزىتىش مەقسىتىدە يۇقىرى ئېنىقلىقتىكى ئوپتىكىلىق سېنزورلاردىن پايدىلىنىدۇ. شۇنىڭ بىلەن بىر ۋاقىتتا، قىرغىزىستان ئۈچۈن ناھايىتى زور ئەھمىيەتكە ئىگە مۇزلۇقلار، سۇ مەنبەلىرى، دەريالار ۋە ئەتراپلىق مۇھىت ئۆزگىرىشلىرىنى كۆزىتىش بىلەن بىرگە، تەبىئىي ئاپەت خەۋپلىرىنى ئالدىن بېكىتىشكە ياردەم بېرىدۇ. سۈنئىي ھەمراھنىڭ بارلىق كونتروللۇقى ۋە سانلىق مەلۇمات ئېقىمى پايتەخت بىشكەكتە قۇرۇلغان يەر يۈزى كونترول مەركىزىدىن باشقۇرۇلىدۇ.