ئىسرائىلىيە سۈرىيەدىكى يېڭى ھۆكۈمەت بىۋاسىتە بىر تەھدىت شەكىللەندۈرمىگەن تۇرۇقلۇق، سۈرىيەدىكى بەزى نىشانلارغا ھۇجۇم قىلىشنى داۋاملاشتۇردى. پۇقرالارنىڭ ئۆلۈمىنى ۋە ھەربىي ئۇل ئەسلىھەلەرنىڭ ۋەيران بولۇشىنى كەلتۈرۈپ چىقاردى.
ئىسرائىلىيە ئارمىيەسى شەنبە كۈنى، سۈرىيەنىڭ غەربىي جەنۇبىدىكى قۇنەيتىرە ۋىلايىتىگە قاراشلىق ئەل-سامدانىيە يېزىسى ئەتراپىغا بېسىپ كىردى ۋە كوچىدىن ئۆتكەن-كەچكەنلەرنى تەكشۈرۈش ئۈچۈن ۋاقىتلىق تەكشۈرۈش پونكىتى قۇردى.
سۈرىيە ئەرەب خەۋەر ئاگېنتلىقى (SANA) نىڭ ئۇچۇرىغا ئاساسلانغاندا، ئۈچ ھەربىي ئاپتوموبىلدىن تەركىب تاپقان ئىسرائىلىيە قىسىملىرى رايوندىن چېكىنىشتىن ئىلگىرى، يولدىن ئۆتكەن كىشىلەرنى ئاقتۇرۇپ تەكشۈرگەن.
SANA نىڭ خەۋىرىدە قوشۇمچە قىلىنغان مەلۇماتلارغا قارىغاندا، يېرىم كېچىدىن كېيىن مەيدانغا كەلگەن يەنە بىر ۋەقەدە، 15 تىن ئارتۇق ھەربىي ئاپتوموبىلدىن تەركىب تاپقان ئىسرائىلىيە قوشۇنى، قۇنەيتىرەنىڭ جەنۇبىدىكى ئەل-ئەشھا يېزىسىغا تاجاۋۇز قىلغان، بىر ئۆينى ۋە بىر چارۋا يەم-خەشەك ئامبىرىنى ئاختۇرۇپ تەكشۈرگەندىن كېيىن رايوندىن چىقىپ كەتكەن.
ئىسرائىلىيە ئارمىيەسى بۇ ھۇجۇملارغا مۇناسىۋەتلىك ھازىرچە ھېچقانداق بايانات ئېلان قىلمىدى.
ئىسرائىلىيە 2024-يىلى 8-دېكابىردا بەششار ئەسەد ھاكىمىيىتى يىقىلغاندىن كېيىن، سۈرىيە بىلەن 1974-يىلى ئىمزالانغان چېكىنىش كېلىشىمىنىڭ ئەمەلدىن قالغانلىقىنى جاكارلىغان ۋە بىرلەشكەن دۆلەتلەر تەشكىلاتىنىڭ نازارىتى ئاستىدىكى بۇففېر (ئارىلىق) رايونىغا بېسىپ كىرگەن ئىدى. سۈرىيەنىڭ يېڭى ھۆكۈمىتى بولسا كېلىشىمگە سادىق ئىكەنلىكىنى كۆپ قېتىم مۇئەييەنلەشتۈردى.
ئىسرائىلىيە، سۈرىيەنىڭ يېڭى ھۆكۈمىتى بىۋاسىتە بىر تەھدىت ئېلىپ كەلمىگەن تۇرۇقلۇق، سۈرىيەدە ھاۋا ھۇجۇملىرى ۋە قۇرۇقلۇق ھەرىكەتلىرىنى ئېلىپ بېرىپ، پۇقرالارنىڭ جېنىغا زامىن بولۇشنى شۇنداقلا ھەربىي ئۇل ئەسلىھەلەرگە زىيان يەتكۈزۈشنى داۋاملاشتۇرماقتا.
