ياۋروپا ئىتتىپاقى بىلەن پارس قولتۇقى ھەمكارلىق كېڭىشى قوشما بايانات ئېلان قىلىپ، ھېچقانداق دۆلەتنىڭ ئىستراتېگىيەلىك ئەھمىيەتكە ئىگە ھورمۇز بوغۇزىدىن ئۆتۈشنى چەكلىيەلمەيدىغانلىقىنى تەكىتلىدى ۋە ئىراننى سودا پاراخوتلىرىغا قىلىۋاتقان ھۇجۇملىرىنى توختىتىشقا چاقىردى.
ياۋروپا ئىتتىپاقى بىلەن پارس قولتۇقى ھەمكارلىق كېڭىشى ھورمۇز بوغۇزى ئۈستىدىن ئىگىلىك ھوقۇق يۈرگۈزۈش ياكى كونترول قىلىشقا ئۇرۇنغان ھەر قانداق دۆلەتنىڭ «قانۇنسىز» تەلىپىنى رەت قىلىدىغانلىقلىرىنى، شۇنداقلا بۇ ئىستراتېگىيەلىك دېڭىز يولىدىن ئۆتىدىغان خەلقئارالىق پاراخوتلارغا رۇخسەتنامە بېرىش ياكى ھەق ئېلىشقا قارشى تۇرىدىغانلىقلىرىنى بىلدۈردى.
بىريۇسسېلدا ئۆتكۈزۈلگەن «رايون خەۋپسىزلىكى ۋە ھەمكارلىقى يۇقىرى دەرىجىلىكلەر مۇنبىرى»دىن كېيىن ئېلان قىلىنغان قوشما باياناتتا: «دۆلەتلەر ئارىسىدىكى ھەر قانداق ئىككى تەرەپلىك كېلىشىم، چۈشىنىش ھاسىل قىلىش ياكى ئەسلەتمە كېلىشىملىرى، خەلقئارالىق بوغۇزدىن ئۆتۈش ھوقۇقىنى قانۇنسىز رەت قىلالمايدۇ ياكى چەكلىيەلمەيدۇ» دەپ كۆرسىتىلدى.
باياناتتا، خەلقئارالىق بوغۇزلاردىن ئۆتۈش ھوقۇقىنىڭ خەلقئارا قانۇن بويىچە بارلىق دۆلەتلەر ئۈچۈن كاپالەتكە ئىگە قىلىنغانلىقىنى، ھەمدە «ھېچقانداق دۆلەتنىڭ كونتروللۇقىغا ياكى رۇخسىتىگە بېقىنىپ قالمايدىغانلىقى» تەكىتلەندى.
مەزكۇر مۇنبەرگە، ياۋروپا ئىتتىپاقىنىڭ تاشقى مۇناسىۋەتلەر ۋە خەۋپسىزلىك سىياسىتى ئالىي ۋەكىلى كاجا كاللاس (Kaja Kallas) ۋە بەھرەين تاشقى ئىشلار ۋەزىرى ئابدۇللاتىف بىن راشىد ئەل زايانى بىرلىكتە رىياسەتچىلىك قىلدى.
ياۋروپا ئىتتىپاقى بىلەن پارس قولتۇقى ھەمكارلىق كېڭىشى ھورمۇز بوغۇزىدىن ئۆتۈشنى ئۆز ئىچىگە ئالغان پاراخوت قاتنىشى ئەركىنلىكىنىڭ، «ب د ت دېڭىز قانۇنى ئەھدىنامىسى» دە ئەكىس ئەتتۈرۈلگەن خەلقئارا قانۇنلار بويىچە كاپالەتكە ئىگە ئىكەنلىكىنى قايتا تەكىتلىدى.
باياناتتا: «بارلىق دۆلەتلەرنىڭ پاراخوتلىرى بۇ ھوقۇقتىن بەھرىمان بولىدۇ، ھېچقانداق دۆلەت ئۇلارنى توختىتىپ قويالمايدۇ، توسقۇنلۇق قىلالمايدۇ ياكى ئۇلارغا ھەر قانداق شەرت قويالمايدۇ» دېيىلدى.
مۇناسىۋەتلىك ئۇچۇرلارTRT World - Iran rains missiles on 'US military bases' in six Arab countries
