ئامېرىكا مەركىزىي قوماندانلىق ئىشتابى (CENTCOM)، ئىرانغا قاراتقان ئارقا-ئارقىدىن 6 كۈن داۋاملاشقان ھۇجۇم دولقۇنىنىڭ تۈنۈگۈن كېچىدىكى ئاخىرقى باسقۇچىنى تاماملىغانلىقىنى ئۇقتۇردى.

ئامېرىكا مەركىزىي قوماندانلىق ئىشتابى تەرىپىدىن ئېلان قىلىنغان يازما باياناتتا: «مەركىزىي قوماندانلىق ئىشتابى ئامېرىكا شەرق ۋاقتى 21:40 تىكى (تۈركىيە ۋاقتى 04:40) ئىرانغا قاراتقان ئەڭ ئاخىرقى كەڭ كۆلەملىك ھۇجۇم دولقۇنىنى ئاخىرلاشتۇردى» دېيىلدى.

ئامېرىكانىڭ ئىراننىڭ ساھىل كۆزىتىش ۋە ھاۋا مۇداپىئە نۇقتىلىرى، ھەربىي ئەشيا ئوبوروتى ئۇل ئەسلىھەلىرى ۋە دېڭىزچىلىق ئىقتىدارى قاتارلىق ھەربىي نىشانلىرىنى ئۇرۇش ئايروپىلانلىرى، ئۇچقۇچىسىز ھاۋا ئاپپاراتلىرى ۋە ئۇرۇش پاراخوتلىرى بىلەن بومباردىمان قىلغانلىقى ئەسكەرتىلگەن باياناتتا، بۇنىڭ ئامېرىكانىڭ ئىرانغا ئارقا-ئارقىدىن قىلغان ھۇجۇملىرىنىڭ ئالتىنچى كېچىسى ئىكەنلىكى تەكىتلەندى.

باياناتتا، ھازىرقى ئەھۋالدا 50 مىڭدىن ئارتۇق ئامېرىكا ئەسكىرىنىڭ ئوتتۇرا شەرقتە ۋەزىپە ئۆتەۋاتقانلىقى قەيت قىلىندى.

ئامېرىكا مەركىزىي قوماندانلىق ئىشتابى، تۈنۈگۈن تۈركىيە ۋاقتى 21:00 دە ئىرانغا قاراتقان يېڭى بىر ھاۋا ھۇجۇمى دولقۇنى باشلىغانلىقىنى ئۇقتۇرغان ئىدى.

ئىران تاراتقۇلىرى، ئامېرىكا ئارمىيەسىنىڭ ئىرانغا يېڭى بىر ھۇجۇم دولقۇنى باشلىغانلىقىنى ئۇقتۇرغاندىن كېيىن، ئىرانشەھەر ئايرودۇرۇمى ۋە ھەمىدىيە شەھىرىدىن باشقا يەنە بەندەر ئابباستىكى بىر كۆۋرۈكنىڭ نىشان قىلىنغانلىقىنى خەۋەر قىلغان ئىدى.