رۇسىيە تاشقى ئىشلار مىنىستىرلىقى، مىنىستىر سېرگېي لاۋروۋ بىلەن ئامېرىكا تاشقى ئىشلار مىنىستىرى ماركو رۇبىيونىڭ ئۇكرائىنادىكى توقۇنۇشنى ھەل قىلىش مۇمكىنچىلىكى ھەمدە دۈشەنبە كۈنى تۈركىيەدە ئۆتكۈزۈلۈشى پىلانلىنىۋاتقان رۇسىيە-ئۇكرائىنا سۆھبىتى توغرىسىدا سۆزلەشكەنلىكىنى ئۇقتۇردى.
مىنىستىرلىق يەكشەنبە كۈنى تور بېتىدە ئېلان قىلغان باياناتىدا: «ئۇكرائىنا كىرىزىسىغا مۇناسىۋەتلىك ۋەزىيەت مۇزاكىرە قىلىندى» دېدى.
باياناتتا: «سېرگېي لاۋروۋ بىلەن ماركۇ رۇبىيو ئۇكرائىنا كىرىزىسىنى ھەل قىلىشقا ئائىت تۈرلۈك مەسىلىلەر ھەققىدە پىكىر ئالماشتۇردى، بۇلارنىڭ ئىچىدە 2-ئىيۇن رۇسىيە-ئۇكرائىنا سۆھبىتىنى ئىستانبۇلدا قايتا باشلاش پىلانىمۇ بار» دېگەن ئىبارىلەرگە ئورۇن بېرىلدى.
ئامېرىكا تاشقى ئىشلار مىنىستىرلىقى سۆھبەتنىڭ رۇسىيەنىڭ تەلىپىگە ئاساسەن ئېلىپ بېرىلغانلىقىنى بىلدۈرۈپ، رۇبىيونىڭ ئامېرىكا پىرېزىدېنتى دونالد ترامپنىڭ رۇسىيە بىلەن ئۇكرائىنا ئوتتۇرىسىدا بىۋاسىتە سۆھبەتنى داۋاملاشتۇرۇش چاقىرىقىنى تەكرارلىغانلىقىنى ۋە بۇنىڭ «مەڭگۈلۈك تىنچلىق»نى ئىشقا ئاشۇرۇش ئۈچۈن زۆرۈر ئىكەنلىكىنى تەكىتلىگەنلىكىنى قەيت قىلدى.
شۇنىڭ بىلەن بىر ۋاقىتتا، رۇسىيە خەۋەر ئاگېنتلىقلىرى كىرېمىل مەسلىھەتچىسى ۋلادىمىر مېدىنسكىينىڭ، رۇسىيەنىڭ ئۇكرائىنادىن بىر تىنچلىق كېلىشىمى لايىھەسىنى تاپشۇرۇۋالغانلىقىنى ئېيتقانلىقىنى خەۋەر قىلدى.
تاس خەۋەر ئاگېنتلىقىنىڭ نەقىل قىلىشىچە، مېدىنسكىي: «رۇسىيە ئۆمىكى ئۇكرائىنادىن تىنچلىقپەرۋەر ھەل قىلىش چارىسى ھەققىدىكى ئەسلەتمە لايىھەسىنى تاپشۇرۇۋالدى» دېگەن. مېدىنسكىي دۈشەنبە كۈنى ئۇكرائىنا بىلەن ئۆتكۈزۈلىدىغان تىنچلىق سۆھبىتىدە موسكۋا ئۆمىكىگە رەھبەرلىك قىلىدۇ.
كۆۋرۈكلەر ۋەقەسى
مىنىستىرلىق يەنە سۆھبەت جەريانىدا رۇبىيونىڭ، رۇسىيەنىڭ ئۇكرائىنا چېگراسىغا جايلاشقان ئىككى رايونىدىكى كۆۋرۈكلەرنىڭ پارتىلىتىلىشى نەتىجىسىدە يۈز بەرگەن ئۆلۈم-يېتىم ئۈچۈن تەزىيە بىلدۈرگەنلىكىنى قەيت قىلىپ: «رۇسىيە تەرەپ، مۇناسىۋەتلىك ئورگانلارنىڭ ئەتراپلىق تەكشۈرۈش ئېلىپ بارىدىغانلىقى ۋە نەتىجىلىرىنىڭ ئېلان قىلىنىدىغانلىقىنى تەكىتلىدى. جىنايەتچىلەر ئېنىقلىنىدىغانلىقى، شۈبھىسىزكى، ئۇلارنىڭ تېگىشلىك جازاغا تارتىلىدۇ» دېدى.
رۇسىيە ئەمەلدارلىرى، شەنبە كۈنى ئىككى كۆۋرۈكنىڭ پارتىلىتىلىشى نەتىجىسىدە كەم دېگەندە يەتتە كىشىنىڭ قازا قىلغانلىقىنى ۋە 69 كىشىنىڭ يارىلانغانلىقىنى ئېلان قىلغانىدى.
ئۇكرائىنا ھۇجۇمى
ئىككى ئەمەلدار ئوتتۇرىسىدىكى بۇ سۆھبەت، ئۇكرائىنانىڭ رۇسىيە ھاۋا ئارمىيە بازىلىرىغا مىسلى كۆرۈلمىگەن دەرىجىدە شىددەتلىك ھۇجۇم قىلىشىدىن كېيىن ئېلىپ بېرىلدى.
بىر ئۇكرائىنالىق ھۆكۈمەت ئەمەلدارى رېيتېر خەۋەر ئاگېنتلىقىغا ئۇكرائىنانىڭ رۇسىيە ھاۋا ئارمىيە بازىلىرىغا قىلىنغان ئۇچقۇچىسىز ھاۋا ئاپپاراتى ھۇجۇملىرى ھەققىدە ئامېرىكا قوشما ئىشتاتلىرىنى ئالدىن خەۋەرلەندۈرمىگەنلىكىنى بىلدۈردى.
ئۇكرائىنا دۆلەت ئىچى ئىستىخبارات ئىدارىسى تۆت بازىغا قىلىنغان ھۇجۇملارنىڭ جاۋابكارلىقىنى ئۈستىگە ئالدى؛ بىر بىخەتەرلىك ئەمەلدارى جەمئىي 41 دانە رۇسىيە ئۇرۇش ئايروپىلانىنىڭ پاچاقلاپ تاشلانغانلىقىنى ئىلگىرى سۈردى.
رۇسىيە دۆلەت مۇداپىئە مىنىستىرلىقى، ئىككى رايوندىكى بازىلاردىكى ئايروپىلانلارغا ئوت كەتكەنلىكىنى، بىراق ئوتنىڭ ئۆچۈرۈلگەنلىكىنى ئېلان قىلدى.
