تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان شەنبە كۈنى ئېلان قىلغان باياناتىدا، ئىران ۋە لىۋاندا مەكتەپ ۋە دوختۇرخانىلارنى نىشانلىغانلىقىنى ئېيتقان «قانخور بىر تور» نى ئەيىبلىدى ۋە بۇنىڭ غەززەدە كۆرۈلگەن ۋەيرانچىلىقنى ئەسلىتىدىغانلىقىنى تىلغا ئالدى.
ئىستانبۇلدا ئۆتكۈزۈلگەن بىر ئىپتار پىروگراممىسىدا سۆز قىلغان ئەردوغان، رايوندا زوراۋانلىق كېڭىيىۋاتقان بىر پەيتتە پۇقراۋى ئۇل ئەسلىھەلەرنىڭ داۋاملىق نىشانغا ئېلىنىۋاتقانلىقىنى ئېيتتى.
ئەردوغان: «غەززەدە بولغاندەك، ئىران ۋە لىۋاندىمۇ مەكتەپ ۋە دوختۇرخانىلارنى نىشان قىلغان قانخور بىر تور ھۇجۇملىرىنى داۋاملاشتۇرماقتا» دېدى.
جۇمھۇر رەئىس رايوندا جىددىيچىلىك كۈچەيگەن بىر مەزگىلدە، تۈركىيەنىڭ ئېھتىياتچانلىق ۋە دىپلوماتىك ھەل قىلىش چارىلىرىنى تەلەپ قىلىۋاتقان دۆلەتلەر ئارىسىدا ئىكەنلىكىنى تەكىتلىدى.
جۇمھۇر رەئىس رەجەپ تاييىپ ئەردوغان يەنە: «تۈركىيە بىز ئىچىدە تۇرۇۋاتقان بۇ ئەقىلدىن ئادىشىش مۇھىتىدا، كرىزىسلارنى ھەل قىلىش يولىدا ئەقىل، سۆھبەت ۋە دىپلوماتىيەنى ياقىلايدىغان ئالدىنقى قاتاردىكى دۆلەتلەر قاتارىدىن ئورۇن ئالماقتا» دېگەن سۆزلەرنى ئىشلەتتى.
يېقىن شەرقتىكى كرىزىس، ئىسرائىلىيە بىلەن ئامېرىكانىڭ 28-فېۋرالدا ئىرانغا قارىتا بىرلەشمە ھۇجۇم باشلىشىدىن كېيىن تېخىمۇ كەسكىنلەشتى.
ھۇجۇملاردا ئىراننىڭ سابىق دىنىي رەھبىرى ئەلى خامەنېي ۋە 150 دىن ئارتۇق ئوقۇغۇچى قىزنى ئۆز ئىچىگە ئالغان 1200 دىن ئارتۇق كىشىنىڭ ھاياتىدىن ئايرىلغانلىقى، 10 مىڭدىن ئارتۇق كىشىنىڭ يارالانغانلىقى خەۋەر قىلىندى.
بۇنىڭغا قارىتا ئىران؛ ئىسرائىلىيە، ئىيوردانىيە، ئىراق ۋە ئامېرىكا ھەربىي كۈچلىرى تۇرۇۋاتقان بىر قىسىم پارىس قولتۇقى دۆلەتلىرىنى نىشانلىغان ئۇچقۇچىسىز ئايروپىلان ۋە باشقۇرۇلىدىغان بومبا ھۇجۇملىرىنى ئېلىپ باردى. توقۇنۇشلار باشلانغاندىن بۇيان سەككىز ئامېرىكا ئەسكىرى ھاياتىدىن ئايرىلدى.
