ھاماس شەنبە كۈنى ئېلان قىلغان باياناتىدا، ئىراننىڭ ئىسرائىلىيە ۋە ئامېرىكاغا قارشى ئۆزىنى قوغداش ھوقۇقىنى قوللايدىغانلىقىنى، ئەمما قوشنا دۆلەتلەرگە قارىتىلغان ھۇجۇملاردىن ساقلىنىش كېرەكلىكىنى بىلدۈردى.
گۇرۇپپا يەنە 28-فېۋرال باشلانغان ۋە يېقىن شەرققە يېيىلغان ئۇرۇشنى ئاخىرلاشتۇرۇش ئۈچۈن خەلقئارا جەمئىيەتنى قەدەم تاشلاشقا چاقىردى.
ھاماس باياناتىدا: «ئىران ئىسلام جۇمھۇرىيىتىنىڭ خەلقئارا قانۇن ۋە ئۆلچەملەر دائىرىسىدە بۇ تاجاۋۇزچىلىققا قولىدىكى بارلىق ۋاسىتىلەر بىلەن تاقابىل تۇرۇش ھوقۇقىنى مۇئەييەنلەشتۈرۈش بىلەن بىرگە، ئىراندىكى قېرىنداشلىرىمىزنى قوشنا دۆلەتلەرنى نىشان قىلىشتىن ساقلىنىشقا چاقىرىمىز» دېگەن ئىبارىلەرنى ئىشلەتتى.
غەززەدە ئىسرائىلىيە بىلەن ئىككى يىل داۋاملاشقان ۋەيران قىلغۇچ ئۇرۇشنى باشتىن كەچۈرگەن ھاماس، خەلقئارا جەمئىيەتنىڭمۇ داۋاملىشىۋاتقان ئۇرۇشنى دەرھال توختىتىش ئۈچۈن تىرىشچانلىق كۆرسىتىشى كېرەكلىكىنى ئېيتتى.
ھاماس بۇنىڭدىن ئىلگىرى ئۇرۇشنىڭ بىرىنچى كۈنىدە ئىراننىڭ دىنىي رەھبىرى ئەلى خامەنېينىڭ ئۆلتۈرۈلىشىنى «نەپرەتلىك بىر جىنايەت» دەپ تەسۋىرلىگەن ۋە خامەنېينىڭ پەلەستىن ھەرىكىتىگە ئۇزۇن يىللاردىن بۇيان بەرگەن قوللىشىنى ئاشكارا ئېتىراپ قىلغان ئىدى.
گۇرۇپپا خامەنېينىڭ پەلەستىن خەلقىگە، ئۇلارنىڭ دەۋاسىغا ۋە قارشىلىق كۆرسىتىش ھەرىكەتلىرىگە سىياسىي، دىپلوماتىك ۋە ھەربىي جەھەتتىن ھەر تۈرلۈك ياردەملەرنى تەمىنلىگەنلىكىنى تىلغا ئالغان ئىدى.
ھاماسنىڭ بىر مەسئۇلى AFP ئاگېنتلىقىغا بەرگەن باياناتىدا، ھەرىكەتنىڭ بۇ مەسىلە بىلەن مۇناسىۋەتلىك ئىران دائىرىلىرى بىلەن ئالاقىدە ئىكەنلىكىنى ئېيتتى.
تاراتقۇلارغا سۆز قىلىش ھوقۇقى بولمىغاچقا ئىسمىنى ئاشكارىلاشنى خالىمىغان مەزكۇر مەنبە: «ئىسرائىلىيە ئىشغالىيىتى ئىران بىلەن ئەرەب ۋە ئىسلام قوشنىلىرى ئارىسىدا بۆلگۈنچىلىك پەيدا قىلىشنى نىشان قىلماقتا» دېدى.
ئامېرىكا ۋە ئىسرائىلىيەنىڭ ھەربىي ئەۋزەللىكىگە قارىماي، ئىران ئاز دېگەندە 10 دۆلەتنى نىشانلىغان باشقۇرۇلىدىغان بومبا ۋە ئۇچقۇچىسىز ئايروپىلان ھۇجۇملىرىنى قىلىپ ئۆچ ئالدى.
