تۈركىيە جۇمھۇرىيىتى جۇمھۇر رەئىسى ئەردوغان، 9-ماي ياۋروپا بايرىمى مۇناسىۋىتى بىلەن ئېلان قىلغان ئۇچۇرىدا، ياۋروپا ئىتتىپاقىنىڭ ئاساسىنى سالغان شۇمان خىتابنامىسى ئېلان قىلىنغان 9-ماي ياۋروپا بايرىمىنىڭ تىنچلىق، ھەمكارلىق ۋە ئۆزئارا ھۆرمەتكە ئاساسلانغان ئورتاق كەلگۈسى بەرپا قىلىش نىشانىنىڭ كونكرېت بىر ئىپادىسى ئىكەنلىكىنى بىلدۈردى.
ئەردوغان ياۋروپا ئىتتىپاقى ئاساسلانغان قائىدىلەرنىڭ بۈگۈن كۆپ تەرەپلىمىلىك كرىزىسلار بىلەن بىر ۋاقىتتا ئېغىر سىناققا دۇچ كېلىۋاتقانلىقىنى تەكىتلەپ مۇنداق دېدى:
«ياۋروپا ئىتتىپاقىنىڭ ئاساسىنى سالغان شۇمان خىتابنامىسى ئېلان قىلىنغان <9-ماي ياۋروپا بايرىمى> ياۋروپا ئىتتىپاقىنىڭ سىمۋوللىرىنىڭ بىرى بولۇش بىلەن بىرگە، قىتئەمىزدە تىنچلىق، ھەمكارلىق ۋە ئۆزئارا ھۆرمەتكە ئاساسلانغان ئورتاق كەلگۈسى بەرپا قىلىش نىشانىنىڭمۇ كونكرېت ئىپادىسىدۇر. بۇنىڭدىن 76 يىل ئىلگىرى ئاساسى سېلىنغان ياۋروپا ئىتتىپاقى ئاساسلانغان قائىدىلەر، كۆپ تەرەپلىمىلىك كرىزىسلار بىلەن ئېغىر سىناققا دۇچ كەلمەكتە. يەر شارى خاراكتېرلىك تەسىرى ھېس قىلىنىۋاتقان ئۇرۇشلار، سىياسىي كرىزىسلار ۋە ئىقتىسادىي قىيىنچىلىقلار ياۋروپا ئىتتىپاقىنىڭ تېخىمۇ كەڭ قورساق ۋە بىرلەشتۈرگۈچى سىياسەتلەرنى يۈرگۈزۈشىنى جىددىي تەقەززا قىلماقتا»
ياۋروپا ئىتتىپاقى نامزاتى بولغان تۈركىيە، بۇ مۇساپىنىڭ ئاساسلىق ۋە ۋاز كەچكۈسىز تەركىبىي قىسمى بولۇشنى داۋاملاشتۇرماقتا. بۈگۈنكى كۈندە، تۈركىيە ئۆزىگە تېگىشلىك ئورۇننى ئالمىغان تەقدىردە ياۋروپا قۇرۇلمىسىنىڭ چالا قالىدىغانلىقى، كرىزىسلارنى باشقۇرۇش ئىقتىدارىدا ئاجىزلىق كۆرۈلىدىغانلىقى ئېنىقتۇر. ئىلگىرىمۇ بايان قىلغىنىمىزدەك، ياۋروپا ئىتتىپاقىنىڭ تۈركىيەگە بولغان ئېھتىياجى، تۈركىيەنىڭ ئىتتىپاققا بولغان ئېھتىياجىدىن كۆپتۇر، كەلگۈسىدە بۇ ئېھتىياج تېخىمۇ ئاشىدۇ.
«ئۆزئارا مەنپەئەت يەتكۈزۈش» ۋە «ۋەدىگە ۋاپا قىلىش» تەكىتلەندى
تۈركىيە بولۇش سۈپىتىمىز بىلەن، ۋەدىگە ۋاپا قىلىش پرىنسىپى ئاساسىدا تولۇق ئەزالىق نىشانى بىلەن ياۋروپا ئىتتىپاقى بىلەن بولغان مۇناسىۋەتلىرىمىزنى ئۆزئارا مەنپەئەت يەتكۈزۈش چۈشەنچىسى بىلەن ئىلگىرى سۈرۈش ئىرادىمىز بار. بۇ سەمىمىي ئىرادىنىڭ ياۋروپا ئىتتىپاقى تەرىپىدىنمۇ كۆرسىتىلىشىنى كۈتىمىز. بۇ قاراشلار بىلەن <9-ماي ياۋروپا بايرىمى> نىڭ ئورتاق جۇغراپىيەمىزدە تىنچلىق، خاتىرجەملىك ۋە ھەمكارلىققا ۋەسىلە بولۇشىنى تىلەيمەن، پۇقرالىرىمىز ۋە بارلىق ياۋروپا خەلقلىرىنىڭ ياۋروپا بايرىمىنى تەبرىكلەيمەن.
