جۇمھۇر رەئىس رەجەپ تاييىپ ئەردوغان پەيشەنبە كۈنى ئوماننىڭ پايتەختى مەسقەتتە سۇلتان ھەيسەم بىن تارىق بىلەن كۆرۈشۈپ، سانائەت، دۆلەت مۇداپىئەسى ۋە ئۇچۇر-ئالاقە ساھەلىرىدىكى ئىككى تەرەپلىك ھەمكارلىقنى كۈچەيتىش مەسىلىلىرىنى مۇزاكىرە قىلدى.
رەھبەرلەر پەلەستىن مەسىلىسىدىكى ھەمكارلىقنى قايتا تەكىتلەش بىلەن بىرگە، رايونلۇق ۋە خەلقئارالىق مەسىلىلەر ھەققىدىمۇ سۆزلەشتى. بۇ زىيارەت جۇمھۇر رەئىس ئەردوغاننىڭ كۇۋەيت ۋە قاتارنى ئۆز ئىچىگە ئالغان پارس قولتۇقىدىكى ئۈچ دۆلەت زىيارىتىنىڭ ئاخىرقى بېكىتى بولدى.
تۈركىيە دىپلوماتىيە مەنبەلىرى پەيشەنبە كۈنىدىكى سۆھبەتنىڭ مەسقەتتىكى ئەلئەلەم ئوردىسىدا يېپىق ھالەتتە ئېلىپ بېرىلغانلىقىنى بىلدۈردى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسى تەرىپىدىن ئېلان قىلىنغان باياناتتا، ئىككى رەھبەرنىڭ سۆھبەتتە ئىككى تەرەپ مۇناسىۋەتلىرى، رايونلۇق ۋە خەلقئارالىق مەسىلىلەرنى مۇزاكىرە قىلغانلىقى بىلدۈرۈلدى.
باياناتتا مۇنۇلار قەيت قىلىندى: «جۇمھۇر رەئىس ئەردوغان سۆھبەتتە، تۈركىيە بىلەن ئوماننىڭ چوڭقۇر تارىخىي ۋە قېرىنداشلىق رىشتىلىرىنىڭ بارلىقىنى، ئىككى دۆلەت ئوتتۇرىسىدىكى ئىتتىپاقلىقنىڭ بۇ زىيارەت بىلەن تېخىمۇ مۇستەھكەملەنگەنلىكىنى ئىپادىلىدى».
«جۇمھۇر رەئىسىمىز ئومان بىلەن سانائەتتىن تارتىپ ئىقتىسادقىچە، دۆلەت مۇداپىئەسىدىن تارتىپ ئۇچۇر-ئالاقىغىچە بولغان نۇرغۇن ساھەدە ھەمكارلىقنىڭ تەرەققىي قىلدۇرۇلىدىغانلىقىنى بىلدۈردى.»
باياناتتا يەنە: «جۇمھۇر رەئىس ئەردوغان، تۈركىيە بىلەن ئوماننىڭ پەلەستىن دەۋاسىنى ئاساس قىلغان نۇرغۇن مەسىلىدە مەيدانىنىڭ بىردەك ئىكەنلىكىنى، ئوماننىڭ ئۆز رايونىدىكى ۋاسىتىچىلىك ۋە دىيالوگنى ئاساس قىلغان تىرىشچانلىقلىرىغا يۇقىرى باھا بېرىدىغانلىقىمىزنى، غەززەدە ئىككى دۆلەتلىك ھەل قىلىش چارىسى ئۈچۈن بىرلىكتە خىزمەت قىلىنىدىغانلىقىنى ئىپادىلىدى» دېگەن ئىبارىلەرگە ئورۇن بېرىلدى.
سۆھبەتتىن كېيىن ئىككى دۆلەت ئوتتۇرىسىدا جەمئىي 16 يېڭى ھۆججەتنىڭ قوبۇل قىلىنغانلىقى بىلدۈرۈلدى.
