تۈركىيە ئەسەد ئاغدۇرۇلغانلىقىنىڭ بىرىنچى خاتىرە يىلىدا سۈرىيەنىڭ «ھۈررىيەت كۈنى»نى تەبرىكلىدى

تۈركىيە دۈشەنبە كۈنى، ئەسەد تۈزۈمىنىڭ گۇمران بولغانلىقىنىڭ بىر يىللىقىنى خاتىرىلەپ، سۈرىيە خەلقى «ھۈررىيەت كۈنى» دەپ ئاتىغان بۇ تارىخىي كۈننى قىزغىن مۇبارەكلىدى.

تۈركىيە شۇنداقلا، 13 يىللىق ئىچكى ئۇرۇشتىن كېيىن، سۈرىيەدىكى نازۇك نورمال ھالەتكە ئۆتۈش باسقۇچىغا ياردەم بېرىشنى داۋاملاشتۇرىدىغانلىقىنى يەنە بىر قېتىم جەزملەشتۈردى.

تۈركىيە تاشقى ئىشلار مىنىستىرلىقى ئېلان قىلغان باياناتىدا، بەششار ئەسەدنىڭ رۇسىيەگە قېچىپ كېتىشىدىن كېيىن، نۆۋەتتىكى پىرېزىدېنت ئەھمەد شارا (شەرئ) رەھبەرلىكىدىكى ئۆكتىچى گۇرۇپپىلاردىن تەشكىل تاپقان بىرلەشمە ھۆكۈمەتنىڭ، ئۆتكەن بىر يىلنى «كۆپلىگەن مەسىلىلەر» بىلەن كۈرەش قىلىش ۋە تېخىمۇ ئاقىلانە، تىنچلىقپەرۋەر تاشقى سىياسەت يۈرگۈزۈش ئارقىلىق ئۆتكۈزگەنلىكىنى بىلدۈردى.

تۈركىيە تەرەپ، ئۈزلۈكسىز داۋاملىشىۋاتقان بىخەتەرلىك ئەندىشىسى، ئىقتىسادىي چېكىنىش ۋە ھېلىھەم مەۋجۇت ئىنسانپەرۋەرلىك كىرىزىسىغا قارىماي، يېڭى ھۆكۈمەتنىڭ سۈرىيەنىڭ خەلقئارا جەمئىيەتتىكى ئورنىنى قايتىدىن تىكلەش يولىدا «مۇقىم قەدەملەر» نى تاشلىغانلىقىنى تەكىتلىدى.

مەزكۇر جەريان، رايوندىكى نۇرغۇن دۆلەتلەر تەرىپىدىن توقۇنۇشلارنىڭ قايتا باشلىنىشىنىڭ ئالدىنى ئېلىش ئۈچۈن ھەل قىلغۇچ ئەھمىيەتكە ئىگە دەپ قارالماقتا.

باياناتتا: «تۈركىيە بولۇش سۈپىتىمىز بىلەن، سۈرىيەدە مۇقىملىق، بىخەتەرلىك ۋە پاراۋانلىقنى بەرپا قىلىش يولىدىكى تىرىشچانلىقلارنى ئەڭ كۈچلۈك شەكىلدە قوللاشنى داۋاملاشتۇرىمىز» دېيىلدى ۋە ئەنقەرەنىڭ دىپلوماتىك ئالاقىلەر، چېگرا ھالقىغان ياردەم مېخانىزملىرى ۋە مۇساپىرلارنىڭ قايتۇرۇلۇشى مەسىلىسىدىكى ھەمكارلىقنى داۋاملاشتۇرۇش ئىرادىسى يەنە بىر قېتىم نامايان قىلىندى.