غەززەدىكى پەلەستىن ھۆكۈمىتى ئاخبارات ۋاستىلىرى ئىشخانىسى يازما بايانات ئېلان قىلىپ، ئىسرائىلىيە ئارمىيەسىنىڭ غەززە رايونىدىكى قوغدانچىسىز خەلققە قاراتقان ھاۋا ھۇجۇملىرىنى داۋاملاشتۇرۇۋاتقانلىقىنى بىلدۈردى.
باياناتتا، ئىسرائىلىيە ئارمىيەسىنىڭ تۈنۈگۈن غەززە رايونىدا ئېلىپ بارغان 34 قېتىملىق ھاۋا ھۇجۇمىدا 71 پەلەستىنلىكنىڭ ھاياتىدىن ئايرىلغانلىقى، ئونلارچە پەلەستىنلىكنىڭ يارىلانغانلىقى ئەسكەرتىلدى، غەززەدىكى پۇقرالار ۋە ئاساسىي قۇرۇلمىلارنى نىشان قىلغان بۇ ھاۋا ھۇجۇملىرىنىڭ ئىسرائىلىيەنىڭ قارا تارىخىغا يېزىلغان دەھشەتلىك جىنايەتلەردىن ئىكەنلىكى تەكىتلەندى.
باياناتتا تەكىتلىنىشىچە، ئىسرائىلىيەنىڭ يېقىنقى 24 سائەت ئىچىدە ئېلىپ بارغان ھاۋا ھۇجۇملىرىدىن كېيىن، ئىمكانىيىتى چەكلىك بولغان دوختۇرخانىلار يارىدارلار بىلەن توشۇپ كەتكەن بولۇپ، ئىسرائىلىيە ئارمىيەسى پۇقرالارنى قۇتقۇزۇش گۇرۇپپىلىرىنىڭ جەسەتلەرنى ئېلىپ كېتىشىگە توسالغۇلۇق قىلماقتا ئىكەن.
