كابۇل چېگرا بويىدا ئېلىپ بېرىلغان ئۆچ ئېلىش ھەرىكەتلىرى نەتىجىسىدە كېلىپ چىققان توقۇنۇشلاردا 55 پۇقرانىڭ ئۆلگەنلىكىنى ئىلگىرى سۈردى. پاكىستان بولسا 400 دىن ئارتۇق ئافغانىستان تالىبان ئەزاسىنىڭ ئۆلتۈرۈلگەنلىكىنى، ئەمما پۇقرالارنى نىشانلىمىغانلىقىنى بىلدۈردى.
ئافغانىستان ھۆكۈمىتىنىڭ باياناتچىسى ھەمدۇللاھ فىترەت يەكشەنبە كۈنى ئېلان قىلغان باياناتىدا، پاكىستان بىلەن يۈز بەرگەن توقۇنۇشلاردا 55 پۇقرانىڭ ئۆلگەنلىكىنى تىلغا ئالدى.
ھەمدۇللاھ فىترەت پەيشەنبە كۈنىدىن بۇيان ئارىسىدا ئاياللار ۋە بالىلارمۇ بولغان 55 پۇقرانىڭ ئۆلگەنلىكىنى ئېيتتى. ئۇ يەنە X ھېسابىدا ئايرىم ئېلان قىلغان باياناتىدا، يارىلانغانلار سانىنىڭ 69 غا يەتكەنلىكىنى ۋە پۇقرالارغا تەۋە ئاز دېگەندە بىر نەچچە ئون ئۆينىڭ ۋەيران بولغانلىقىنىمۇ سۆزىگە ئىلاۋە قىلدى.
باياناتچى ئۆلۈم ۋەقەلىرىنىڭ پاكتىكا، خوست، كۇنار، نانگارھار ۋە قەندىھار ۋىلايەتلىرىدە رۇيخەتكە ئېلىنغانلىقىنى بىلدۈردى.
بۇ جەرياندا پاكىستان «ئۆزىنى قوغداش» تىرىشچانلىقلىرىنىڭ پۇقرالارنى نىشانلىمىغانلىقىنى خەۋەر قىلدى.
پاكىستان ئۇچۇر-ئالاقە مىنىستىرى ئاتتائۇللاھ تارار يەكشەنبە كۈنى ئېلان قىلغان باياناتىدا، پەيشەنبە كۈنىدىن بۇيان ئېلىپ بېرىلغان ھاۋا ھۇجۇملىرى ۋە توقۇنۇشلاردا ئافغانىستان تالىبانىغا ئەزا 415 كىشىنىڭ ۋە گۇمانلىق تېررورچىلارنىڭ ئۆلتۈرۈلگەنلىكىنى، 580 دىن ئارتۇق كىشىنىڭ يارىلانغانلىقىنى ئېيتتى.
كابۇل بولسا چېگرا توقۇنۇشلىرىدا 56 پاكىستان ئەسكىرىنىڭ ئۆلتۈرۈلگەنلىكىنى ئىلگىرى سۈردى.
ئىككى قوشنا دۆلەت ئوتتۇرىسىدىكى جىددىيچىلىك، كابۇلنىڭ فېۋرال ئېيى ئاخىرىدا پاكىستاننىڭ ھاۋا ھۇجۇملىرىغا جاۋابەن چېگرا بويىدا «ئۆچ ئېلىش ھەرىكەتلىرى» باشلىغاندىن بۇيان يۇقىرى سەۋىيەدە داۋاملاشماقتا.
چېگرانىڭ ئىككى تەرىپىدىكى سانلىق مەلۇماتلارغا قارىغاندا، ھازىرغىچە 81 كىشى ئۆلگەن.
بۇلارنىڭ ئىچىدە 12 پاكىستان ئەسكىرى ۋە بىر پۇقرا بار. كابۇل بولسا توقۇنۇشلاردا 13 ئەسكىرىنىڭ ئۆلگەنلىكىنى ۋە 55 پۇقرانىڭ ھاياتىدىن ئايرىلغانلىقىنى ئاشكارىلىدى. بىر پاكىستان ئەسكىرى يوقاپ كەتكەن.
ئىسلامئاباد ۋە كابۇلنىڭ تالافەت دەۋالىرى تېخى دەلىللەنمىدى.
يەنە بىر تەرەپتىن، دۆلەت ئىگىلىكىدىكى پاكىستان تېلېۋىزىيەسىنىڭ بىخەتەرلىك مەنبەلىرىگە تايىنىپ بەرگەن خەۋىرىگە قارىغاندا، پاكىستان شەنبە كۈنى كىللا سەيفۇللاھ رايونىدا «تېررورچىلارنىڭ» سىڭىپ كىرىش ئۇرۇنۇشىنى توسۇپ قالغان.
تېلېۋىزىيە قانىلى «پاكىستان قوراللىق كۈچلىرىنىڭ سىڭىپ كىرىش ئۇرۇنۇشىنى توسۇپ قېلىشىدىن كېيىن كۆپلىگەن تېررورچىلار ئۆلتۈرۈلدى» دەپ بايانات بەردى.
پاكىستان فېۋرال ئېيى ئاخىرلىرىدا «تېررور نىشانلىرىغا» ھاۋا ھۇجۇمى ئۇيۇشتۇرۇپ 70 كىشىنى ئۆلتۈرگەن ئىدى. ئافغانىستان دائىرىلىرى ۋە ب د ت پۇقرالارنىڭ ئۆلۈمىنى تىلغا ئالغان بولسىمۇ، پاكىستان بۇ دەۋالارنى رەت قىلماقتا.
پاكىستاننىڭ «تېررورچىلار ئافغانىستان تۇپرىقىدا پائالىيەت قىلىۋاتىدۇ» دەپ دەۋا قىلىشى بىلەن، ئىككى تەرەپ مۇناسىۋىتى يېقىنقى ئايلاردا ناچارلاشقان ئىدى. كابۇل بولسا بۇ دەۋانى رەت قىلىدۇ. رايون خاراكتېرلىك دىپلوماتىك ئالاقىلەر داۋاملاشماقتا.
