تۈركىيە ئىنجىرلىك ھاۋا ئارمىيە بازىسىنىڭ پۈتۈنلەي تۈركىيەنىڭ كونتروللۇقىدا ئىكەنلىكىنى بىلدۈردى

 تۈركىيە ئارمىيەسى ئىنجىرلىك ھاۋا ئارمىيە بازىسىنىڭ تۈركىيە جۇمھۇرىيىتىنىڭ مال-مۈلكى ئىكەنلىكىنى ۋە تۈركىيە قوراللىق كۈچلىرىنىڭ كونتروللۇقىدىكى بىر تۈركىيە بازىسى ئىكەنلىكىنى ئەسكەرتتى.

تۈركىيە ئارمىيەسىنىڭ چارشەنبە كۈنى ئېلان قىلىنغان باياناتىدا، ناتو ۋە ئىتتىپاقداشلارنىڭ بارلىق پائالىيەتلىرىنىڭ دۆلەتنىڭ قانۇن-بەلگىلىمىلىرى ۋە تۈركىيەنىڭ ئىگىلىك ھوقۇقىغا ئۇيغۇن ھالدا ئېلىپ بېرىلىۋاتقانلىقى قەيت قىلىندى.

ئادانا ۋىلايىتىگە جايلاشقان ۋە تۈركىيە ھاۋا ئارمىيەسىنىڭ 10-ئاساسىي رېئاكتىپ ئايروپىلان بازىسى قوماندانلىق ئىشتابى قارمىقىدا پائالىيەت ئېلىپ بېرىۋاتقان ئىنجىرلىك ھاۋا ئارمىيەسى بازىسى؛ ھاۋادا يېقىلغۇ تولۇقلاش ئايروپىلانلىرى، ئۇرۇش ئايروپىلانلىرى، ئۇنىۋېرسال تىك ئۇچار ئايروپىلانلار ۋە ئۇچقۇچىسىز ھاۋا ئاپپاراتلىرىنىمۇ ئۆز ئىچىگە ئالغان ھەر خىل ھاۋا ۋاسىتىلىرىگە ساھىبخانلىق قىلماقتا.

باياناتتا، بازىدىكى بارلىق ئەسلىھەلەرنىڭ تۈركىيەنىڭ مال-مۈلكى ئىكەنلىكى، بارلىق پائالىيەتلەرنىڭ دۆلەتنىڭ قانۇن-بەلگىلىمىلىرى ۋە تۈركىيە تەرەپ بولغان خەلقئارالىق كېلىشىملەرگە ئۇيغۇن ھالدا تۈركىيە دائىرىلىرىنىڭ نازارىتى ۋە ماسلاشتۇرۇشى ئاستىدا ئېلىپ بېرىلىدىغانلىقى ئالاھىدە تەكىتلەندى.

ئىنجىرلىك ھاۋا ئارمىيە بازىسىنىڭ قۇرۇلۇشى 1943-يىلىدىكى ئىككىنچى قاھىرە يىغىنىدا چىقىرىلغان قارارلاردىن كېيىن، 1951-يىلى باشلانغان ۋە 1954-يىلى تاماملانغان. بازىنى ھەربىي پائالىيەتلەر ئۈچۈن ئىشلىتىش 1954-يىلى 23-ئىيۇندا «ھەربىي ئەسلىھەلەر كېلىشىمى» ئىمزالانغاندىن كېيىن باشلانغان.

1974-يىلىدىكى قىبرىس تىنچلىق ھەرىكىتى ۋە ئۇنىڭدىن كېيىن ئامېرىكانىڭ تۈركىيەگە يۈرگۈزگەن قورال - ياراغ ئېمبارگوسى سەۋەبىدىن، ناتو پائالىيەتلىرىدىن باشقا، ئىنجىرلىك ۋە چىغلىدىكى بارلىق ئامېرىكا ھەربىي پائالىيەتلىرى 1975-يىلى توختىتىلغان ئىدى. ئامېرىكا دۆلەت مەجلىسى 1978-يىلى سېنتەبىردە ئېمبارگونى بىكار قىلغاندىن كېيىن، ئامېرىكانىڭ تۈركىيەدىكى ھەربىي پائالىيەتلىرى قايتىدىن باشلانغان.

تۈركىيە ئارمىيەسىنىڭ باياناتىدا، تۈركىيە بىلەن ئامېرىكا ئوتتۇرىسىدىكى ھەربىي مۇناسىۋەتلەرنى تەرتىپكە سالىدىغان قانۇنىي رامكىنىڭ، ئىلگىرىكى «ھەربىي ئەسلىھەلەر كېلىشىمى» نىڭ ئورنىنى ئالغان ۋە بازىنى ئىشلىتىش شەرتلىرىنى بەلگىلىگەن 1980-يىلى 29-مارتتا ئىمزالانغان «دۆلەت مۇداپىئە ۋە ئىقتىسادىي ھەمكارلىق كېلىشىمى (SEIA)» بىلەن يېڭىلانغانلىقى ئەسكەرتىلدى.

باياناتتا يەنە، ئىنجىرلىك ھاۋا ئارمىيە بازىسىنىڭ ناتو ۋەزىپىلىرىنى، ئىككى تەرەپلىك كېلىشىملەرنى ۋە بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ پائالىيەتلىرىنى قوللايدىغانلىقى؛ بارلىق خەۋپسىزلىك ۋە ئومۇمىي كونترولنىڭ تۈركىيە دائىرىلىرىنىڭ قولىدا ئىكەنلىكى، چەت ئەللىك خادىملار، ئۈسكۈنىلەر ياكى ئەسلىھەلەرنى ئىشلىتىشنىڭ تۈركىيەنىڭ خەۋەردار بولۇشى ۋە تەستىقى بىلەن ئېلىپ بېرىلىدىغانلىقى تەكىتلەندى.

باياناتتا ناتو ۋە ئىككى تەرەپلىك كېلىشىملەر دائىرىسىدە ئامېرىكا، ئىسپانىيە، پولشا ۋە قاتاردىن كەلگەن ھەربىي خادىملارنىڭ ئىنجىرلىك بازىسىغا ئورۇنلاشتۇرۇلغانلىقى، ئۇلارنىڭ تۈركىيە ئۈچۈن ناتو خەۋپسىزلىك كاپالىتىنىڭ بىر قىسمى سۈپىتىدە ھاۋا مۇداپىئەسى، ئالاقە ياردىمى ۋە جەڭ مۇلازىمىتىنى قوللاش قاتارلىق ۋەزىپىلەرنى ئۆتەۋاتقانلىقى قەيت قىلىندى.