تاشقى ئىشلار مىنىستىرى خاقان فىدان ئەرەب بىرلەشمە خەلىپىلىكىنى زىيارەت قىلىدۇ

2 مىنۇت ئوقۇش

تۈركىيە تاشقى ئىشلار مىنىستىرى فىداننىڭ ئەرەب بىرلەشمە خەلىپىلىكىدىكى زىيارىتى جەريانىدا ئىككى دۆلەت مۇناسىۋىتى، پارس قولتۇقىدىكى ئۆزگىرىشلەر، ھۇرمۇز ۋە بابۇلمەندەپ بوغۇزلىرىدىكى دېڭىز قاتنىشى بىخەتەرلىكى، غەززە ۋە يەمەن مەسىلىلىرى مۇزاكىرە قىلىنىدۇ.

تۈركىيە جۇمھۇرىيىتى تاشقى ئىشلار مىنىستىرلىقى مەنبەلىرىنىڭ بىلدۈرۈشىچە، خاقان فىداننىڭ زىيارەت دائىرىسىدىكى ئۇچرىشىشلىرىدا، تۈركىيە بىلەن ئەرەب بىرلەشمە خەلىپىلىكى ئوتتۇرىسىدىكى يۇقىرى دەرىجىلىك ئىستراتېگىيەلىك كېڭەشنىڭ ئىككىنچى قېتىملىق يىغىنىغا دائىر تەييارلىقلارنى مۇزاكىرە قىلىشى مۆلچەرلەنمەكتە.

فىداننىڭ پارس قولتۇقىدىكى ئۇرۇشنىڭ تەسىرىگە ئەڭ ئېغىر ئۇچرىغان دۆلەتلەرنىڭ بىرى بولغان ئەرەب بىرلەشمە خەلىپىلىكى بىلەن تۈركىيەنىڭ تولۇق ھەمكارلىق ئىچىدە ئىكەنلىكىنى جەزملەشتۈرۈشى كۈتۈلمەكتە.

ئۇنىڭ يەنە رايونغا سىرتتىن ئارىلىشىشنىڭ ئىختىلاپلارنىڭ ئۇزاق مۇددەت داۋاملىشىشىغا سەۋەب بولۇۋاتقانلىقىنى، شۇڭا رايون دۆلەتلىرىنىڭ مەسىلىلەرنى ئۆز مەسئۇلىيىتى بىلەن ھەل قىلىش چۈشەنچىسىنى كۈچەيتىش كېرەكلىكىنى تەكىتلىشى مۆلچەرلەنمەكتە.

فىداننىڭ ھۇرمۇز ۋە بابۇلمەندەپ بوغۇزلىرىدا ئەركىن دېڭىز قاتنىشىغا كاپالەتلىك قىلىشنىڭ رايونلۇق ۋە دۇنياۋى مۇقىملىق ئۈچۈن مۇھىملىقىنى تەكىتلىشى كۈتۈلمەكتە. ئۇ يەنە تىنچلىق ۋە مۇقىملىققا ئېرىشكەن بىرلىككە كەلگەن يەمەننىڭ ئوتتۇرا شەرق بىخەتەرلىكى ئۈچۈنمۇ ھالقىلىق ئەھمىيەتكە ئىگە ئىكەنلىكىنى بىلدۈرىدۇ.

فىداننىڭ غەززەدە ۋاقىتنى ئۆتكۈزمەي تىنچلىق پىلانىنىڭ ئىككىنچى باسقۇچىغا ئۆتۈش، ئىنسانپەرۋەرلىك ۋەزىيىتىنى ياخشىلاش ۋە قايتا قۇرۇش خىزمەتلىرىنى باشلاشنىڭ زۆرۈرلۈكىنى ئوتتۇرىغا قويۇشى پىلانلانماقتا.

بۇ دائىرىدە، تۈركىيە بىلەن ئەرەب بىرلەشمە خەلىپىلىكى قۇرغۇچى ئەزالىرى قاتارىدىن ئورۇن ئالغان تىنچلىق كېڭىشىنىڭ خىزمەتلىرى ھەققىدىمۇ پىكىر ئالماشتۇرۇلىدۇ.

فىداننىڭ ئىسرائىلىيەنىڭ ھۇجۇملىرى ئالدىدا، غەززە ۋە لىۋاندىكى ئۇرۇش توختىتىشنى قوغداش ۋە ئۇنى مەڭگۈلۈك ھالەتكە كەلتۈرۈش ئۈچۈن خەلقئارا جەمئىيەتنىڭ قەتئىي ۋە ئورتاق مەيدان تۇتۇشى كېرەكلىكىنى تەكىتلىشىمۇ مۆلچەرلەنمەكتە.

تەۋسىيە