ئاۋسترالىيە باش مىنىستىرى ئانتونى ئالبانېس كىلىمات ئۆزگىرىشى مىنىستىرى كىرىس بوۋېننىڭ ب د ت كىلىمات ئۆزگىرىشى رامكا ئەھدىنامىسىگە تەرەپ دۆلەتلەر يىغىنى «COP» نىڭ مۇزاكىرىلەر رەئىسى بولىدىغانلىقىنى، تۈركىيەنىڭ يىغىنغا ساھىبخانلىق قىلىپ، «COP»  رەئىسلىكىنى ئۆز ئۈستىگە ئالىدىغانلىقىنى ئېلان قىلدى.

ئاۋسترالىيە باش مىنىستىرى ئانتونى ئالبانېس كانبېررانىڭ نامزاتلىقتىن چېكىنگەنلىكىنى جاكارلىغاندىن كېيىن، كېلەر يىلى ئېچىلىدىغان 31-نۆۋەتلىك ب د ت كىلىمات ئۆزگىرىشى رامكا ئەھدىنامىسىگە تەرەپ دۆلەتلەر يىغىنى تۈركىيەنىڭ ئاقدېڭىز قىرغىقىدىكى ساياھەت شەھىرى ئانتاليادا ئۆتكۈزۈلىدىغان بولدى.

ئالبانېس ئاۋسترالىيەنىڭ «ABC Radio Perth»  ناملىق دۆلەت ئىگىلىكىدىكى رادىيوسىغا بەرگەن باياناتىدا: «(كىلىمات ئۆزگىرىشى مىنىستىرى) كىرىس بوۋېننىڭ ئاۋسترالىيە نامىدىن ‹COP› نىڭ مۇزاكىرىلەر رەئىسى بولۇشى توغرىسىدا بىردەكلىك ھاسىل قىلدۇق» دېدى.

ئالبانېس يەنە مۇنداق دېدى: «يىغىن ۋە ‹COP› رەئىسلىكى تۈركىيەگە بېرىلىدۇ. شۇنىڭ بىلەن بىرگە، خۇسۇسەن تىنچ ئوكياندىكى كىلىمات مەبلىغى ۋە ‹تىنچ ئوكيان چىدامچانلىق فوندى‹غا مەركەزلىشىدىغان بىر تۇنجى ‹COP› يىغىنى ئۆتكۈزۈلىدۇ. بۇ يىغىن، كېلەر يىلى تىنچ ئوكياندا ئۆتكۈزۈلىدىغان ‹COP› نىڭ تەييارلىق يىغىنى خاراكتېرىگە ئىگە.»

ئاۋسترالىيە باش مىنىستىرى بۇ كېلىشىمگە «ھەم ئاۋسترالىيە، ھەم تۈركىيە ئۈچۈن چوڭ ئۇتۇق» دەپ باھا بەردى.

ئالبانېس سۆزىنى داۋاملاشتۇرۇپ: «كىلىمات يىغىنلىرىنىڭ قائىدىسى شۇكى، بۇلار ئۆزئارا كېلىشىم ئاساسىدا ئەمەلگە ئاشۇرۇلىدۇ. ئەگەر كېلىشىم بولمىغان بولسا، بۇ يىغىن گېرمانىيەنىڭ بونن شەھىرىدە ئۆتكۈزۈلگەن بولاتتى» دېگەنلەرنى قەيت قىلدى.