لۇكسور ۋالىيسى ئابدۇلمۇتتەلىب ئامارا قەدىمكىي ئەسەرلەر ئالىي كېڭىشى باش كاتىپى مۇھەممەد ئىسمائىل ۋە مىسىر ئارخېئولوگى دوكتور زاھى ھاۋاسنىڭ قاتنىشىشى بىلەن ئۆتكۈزۈلگەن مەتبۇئات يىغىنىدا، 2022-يىلىنىڭ سېنتەبىر ئېيىدىن بۇيان رايوندا قېزىش خىزمەتلىرىنى داۋاملاشتۇرۇۋاتقان «زاھى ھاۋاس ئارخېئولوگىيە ۋە مىراس ۋەخپى» بىلەن قەدىمكىي ئەسەرلەر ئالىي كېڭىشىگە قاراشلىق ئورتاق ئارخېئولوگىيە گۇرۇپپىسىنىڭ ئۈچ يىللىق خىزمەتلىرى نەتىجىسىدە بۇ مۇھىم بايقاشلارنىڭ قولغا كەلتۈرۈلگەنلىكى بىلدۈرۈلدى.
دوكتور ھاۋاس بايقالغان تېپىلمىلار ئارىسىدا، خانىش ھاتشەپسۇتنىڭ دەپنە قىلىنىش ئىبادەتخانىسىنىڭ ئاساسىي كىرىش دەرۋازىسى دەپ قارالغان «جىلغا ئىبادەتخانىسى» نىڭ ئاساسىي قالدۇقلىرى، ھاتشەپسۇت دەۋرىگە ئائىت نادىر ۋە تەڭداشسىز رېليېفلارنىڭ بارلىقىنى قەيت قىلدى. ئۇ بۇ رېليېفلارنىڭ مىسىر مۇزېيىلىرىدا ناھايىتى ئاز نۇسخىسى بار بولغان، ھەيكەلتاراشلىق سەنئىتىنىڭ ئەڭ گۈزەل نەمۇنىلىرىدىن ئىكەنلىكىنى ئەسكەرتتى.
ئۇنىڭدىن باشقا يەنە، تېپىلغان رېليېفلارنىڭ، رامسېس دەۋرىدە ۋە 19-سۇلالە (مىلادىدىن ئىلگىرى 1292-1186) جەريانىدا بۇزۇلغان جىلغا ئىبادەتخانىسى قالدۇقلىرىنىڭ ئەڭ ياخشى ساقلانغان پارچىلىرى ئىكەنلىكى بىلدۈرۈلدى.
بۇ بايقاشلار قەدىمكىي مىسىر مەدەنىيىتىنىڭ تارىخىغا مۇھىم تۆھپە قوشماقتا. لۇكسور رايونىنىڭ، دۇنيانىڭ ھەر تەرىپىدىن تەتقىقاتچىلارنىڭ ۋە زىيارەتچىلەرنىڭ دىققىتىنى تارتىدىغان تەڭداشسىز ئەسەرلەر بىلەن تولغانلىقىنى يەنە بىر قېتىم ئىسپاتلىماقتا.
