رۇسىيە يەرلىك دائىرىلىرى دۈشەنبە كۈنى رۇسىيەنىڭ جەنۇبىدىكى بىر نېفىت ئامبىرىغا ئۇچقۇچىسىز ئايروپىلان ھۇجۇم قىلىپ، ئوت كەتكەنلىكىنى خەۋەر قىلدى.
رايون مەسئۇللىرى ھۇجۇمدىن كېيىن كراسنودار رايونىغا جايلاشقان لابىنسكتىكى بىر ئامباردا ئوت ئاپىتى يۈز بەرگەنلىكىنى بىلدۈردى.
ۋەقەدە يارىلىنىش ئەھۋالى كۆرۈلمىدى. جىددىي قۇتقۇزۇش ئەترىتى ئوتنى كونترول قىلىشقا تىرىشىۋاتقان بولسىمۇ، دائىرىلەر زىياننىڭ ئېنىق كۆلىمىنى تېخى ئاشكارىلىمىدى.
بۇ رايون رۇسىيەنىڭ ئېنېرگىيە ۋە ھەربىي ئۇل ئەسلىھەلىرىگە قارشى كېڭىيىۋاتقان ھاۋا ھەرىكىتىنىڭ بىر قىسمى سۈپىتىدە، ئۇكرائىنا ئۇچقۇچىسىز ئايروپىلانلىرى تەرىپىدىن كۆپ قېتىم ھۇجۇمغا ئۇچرىغان ئىدى.
ئۆتكەن ھەپتە تىخورېتسك (Tikhoretsk) ئەتراپىدىكى بىر نېفىت ئەسلىھەسىگە، ئافىپسكىي (Afipsky) نېفىت پىششىقلاپ ئىشلەش زاۋۇتىغا ۋە كاۋكاز پورتى ئەتراپىدىكى ئەسلىھەلەرگە ھۇجۇم قىلىنغان ئىدى.
شۇنىڭ بىلەن بىر ۋاقىتتا رۇسىيە، ئۇكرائىنانىڭ ھەپتە ئاخىرىدا موسكۋاغا قارشى ئەڭ چوڭ تىپتىكى ئۇچقۇچىسىز ئايروپىلان ھۇجۇملىرىدىن بىرىنى قوزغىغانلىقىنى ئېيتتى.
موسكۋا شەھەر باشلىقى سېرگېي سوبيانىن، ھاۋا مۇداپىئە سىستېمىسىنىڭ كۆپ ساندىكى «كامىكازې» ئۇچقۇچىسىز ئايروپىلانلىرىغا قارشى تۇرۇشى بىلەن، ئىككى كۈن ئىچىدە 100 دىن ئارتۇق ئۇچقۇچىسىز ئايروپىلاننى توسۇپ قالغانلىقىنى خەۋەر قىلدى.
TASS ئاگېنتلىقىنىڭ خەۋىرىگە قارىغاندا، رۇسىيە مۇداپىئە مىنىستىرلىقى كېچىچە ئاز دېگەندە 145 ئۇچقۇچىسىز ئايروپىلاننى ئېتىپ چۈشۈرۈلگەنلىكىنى، بۇلارنىڭ ئىچىدە 53 نىڭ موسكۋا رايونىدا ئىكەنلىكىنى ئېيتتى.
دۆلەتلىك ئاۋىئاتسىيە نازارەتچىلىك ئاپپاراتىنىڭ بىلدۈرۈشىچە، دائىرىلەر ھۇجۇم جەريانىدا شەھەرنىڭ چوڭ ئايرودروملىرىدىكى ئايروپىلان قاتنىشىنى ۋاقىتلىق چەكلىگەن.
موسكۋا ۋە ئۇنىڭ ئەتراپىدىكى رايونلارنىڭ نوپۇسى تەخمىنەن 22 مىليون ئەتراپىدا.
ئۇكرائىنا پىرېزىدېنتى ۋولودىمىر زېلېنسكىي ياكى ئۇكرائىنا ئەمەلدارلىرىدىن ھۇجۇملارغا مۇناسىۋەتلىك تېخىچە بىرەر بايانات كەلمىدى.
ئۇكرائىنا سۆھبەتكە تەييار
زېلېنسكىي ئامېرىكانىڭ ئۇرۇشنى ئاخىرلاشتۇرۇش ئۈچۈن ئامېرىكا تېررىتورىيەسىدە رۇسىيە بىلەن ئۈچ تەرەپ يىغىنى ئۆتكۈزۈشنى تەكلىپ قىلغانلىقىنى ئېيتقان ئىدى.
ئۇ يەكشەنبە كۈنى كىيېۋدا بەرگەن باياناتىدا، يىغىننىڭ كېلەر ھەپتىگە قالدۇرۇلغانلىقىنى ئېيتتى.
زېلېنسكىي: «بۇ ئەھۋال ئۇرۇشقا مۇناسىۋەتلىك. ئۇلار (ئامېرىكالىقلار) ئامېرىكادا كۆرۈشۈشكە تەييار. بىز سۆھبەتكە تەييار ئىكەنلىكىمىزنى ئېيتتۇق. رۇسلار بولسا ئامېرىكاغا بېرىشقا تەييار ئەمەس. شۇڭا ئامېرىكالىقلارنىڭ جاۋابىنى كۈتىمىز» دېدى.
ئۇكرائىنا رەھبىرى يەنە، ئەگەر ۋاشىنگتون ياكى موسكۋا باشقا بىر جاي تەكتىپ قىلسا، كىيېۋنىڭ باشقا بىر دۆلەتتە مۇزاكىرە ئېلىپ بېرىشقا ئوچۇق ئىكەنلىكىنى سۆزىگە قوشۇمچە قىلدى.
