نىگېرىيەنىڭ غەربىي شىمالىدىكى زامفارا ئىشتاتىغا قاراشلىق بىر كەنتتە يۈز بەرگەن ھۇجۇمدا ئاز دېگەندە 50 كىشى ھاياتىدىن ئايرىلدى، كۆپ ساندا ئايال ۋە بالا تۇتقۇن قىلىندى.
يەرلىك خەلق «قاراقچىلار» دەپ ئاتايدىغان بۇ تېررورچىلارنىڭ ھۇجۇمى پەيشەنبە كۈنى كېچىدە باشلىنىپ، جۈمە كۈنى ئەتىگىچە داۋاملاشتى. موتوسىكلىتلىق ھۇجۇمچىلار، تۇنگان دۇتسې كەنتىدە قېچىشقا ئۇرۇنغان پۇقرالارغا ئوق چىقاردى ۋە بىنالارغا ئوت قويدى. زامفارا ئىشتاتلىق مەجلىس ئەزاسى ھامىسۇ فارۇ، شەنبە كۈنى ئانادولۇ ئاگېنتلىقىدا بۇ ۋەقەنى دەلىللىدى.
فارۇ: «پەيشەنبە كۈنى كېچىدىن بۈگۈن ئەتىگەنگىچە ھېچكىشى ئۇخلىيالمىدى. ئائىلىسىدىن ئۈچ ئەزاسىنى يوقاتقان بەزى كىشىلەرمۇ بار» دېدى.
ھاياتىدىن ئايرىلغانلارنىڭ جەسەتلىرى شەنبە كۈنى ئاق كېپەنلەرگە ئورىلىپ، كوللېكتىپ دەفنە قىلىشقا تەييارلاندى. يەرلىك دائىرىلەر يوقالغانلارنى ئېنىقلاشقا تىرىشىۋاتقانلىقى ئۈچۈن تۇتقۇن قىلىنغانلارنىڭ سانى ھازىرچە ئېنىق ئەمەس.
زوراۋانلىق مىڭلىغان كىشىنى ئۆي-ماكانسىز قويدى
بولۇپمۇ زامفارا ئىشتاتى جايلاشقان غەربىي شىمال رايونىدا نىگېرىيەنىڭ خەۋپسىزلىك ئەھۋالى ئىنتايىن ئېغىر بولماقتا.
بۇ رايون ئۇزۇندىن بۇيان قوراللىق شايكىلارنىڭ ھۇجۇمى، ئادەم تۇتقۇن قىلىش ۋە قاتىللىق ۋەقەلىرى بىلەن زىلزىلىگە كەلمەكتە. مىڭلىغان كىشى ئۆي-ماكانلىرىدىن ئايرىلدى، نۇرغۇن كىشى خەتەر ئىچىدە قالدى.
نىگېرىيە ھۆكۈمىتى، مەسىلىنى ھەل قىلىش ئۈچۈن ئەسكەر ئورۇنلاشتۇرۇش، تېخنىكىلىق ياردەم ۋە ئاخبارات ئالماشتۇرۇش مەقسىتىدە ئامېرىكا قوشما ئىشتاتلىرى قاتارلىق خەلقئارالىق شېرىكلەر بىلەن ھەمكارلىشىشنى ئۆز ئىچىگە ئالغان بەزى قەدەملەرنى تاشلىدى.
بىراق، قوراللىق جىنايەت شايكىلىرى ۋە ئىسيانچى قوراللىق كۈچلەر كەلتۈرۈپ چىقارغان خەۋپسىزلىك تەھدىتلىرى سەۋەبىدىن ئەھۋال يەنىلا قىيىن ئەھچالدا تۇرماقتا.
