تۈركىيە تاشقى ئىشلار مىنىستىرى خاقان فىدان ئىرانغا قارىتىلىدىغان ھاۋا ھۇجۇملىرىنىڭ ھۆكۈمەتنىڭ يىقىلىشىغا سەۋەب بولمايدىغانلىقىنى بىلدۈرۈپ، ھەربىي ھەرىكەتنىڭ تۈزۈم ئۆزگىرىشىنى كەلتۈرۈپ چىقىرىدىغانلىقىغا دائىر دەۋالارنى رەت قىلدى.
فىدان دۈشەنبە كۈنى «CNN Türk» تېلېۋىزىيەسىنىڭ زىيارىتىنى قوبۇل قىلغاندا، «ئىران ھۆكۈمىتى ئاغدۇرۇۋېتىش مەقسىتىدە نىشانغا ئېلىنسا، يىقىلامدۇ؟» دېگەن سوئالغا: «ياق، يىقىلمايدۇ» دەپ جاۋاب بەردى. ئۇ سۆزىنى داۋاملاشتۇرۇپ: «ئىرانغا مۇناسىۋەتلىك بەزى سېنارىيەلەرنى تىلغا ئېلىشنى خالىمايمەن، ئەمما ھاۋا ھۇجۇمى ياكى باشقا بىر ۋاسىتە بىلەن تۈزۈم ئۆزگەرمەيدۇ. بۇ بىر خام خىيال» دېدى.
فىدان ھەربىي ھەرىكەتنىڭ دۆلەتنى ئاجىزلاشتۇرۇۋېتىشى مۇمكىنلىكىنى، ئەمما تۈزۈم ئۆزگىرىشىگە يول ئاچمايدىغانلىقىنى سۆزلىرىگە ئىلاۋە قىلىپ: «مۇنداق بولىدۇ: ھۆكۈمەت ئاجىزلايدۇ، سىستېما ئاجىزلايدۇ، خەلققە مۇلازىمەت قىلالمايدىغان ھالغا چۈشۈپ قالىدۇ. ئۇ چاغدا نۆۋەتتىكى تۈزۈم بەلكىم تېخىمۇ رادىكال قارارلارنى قوبۇل قىلىپ، ئەھۋالنى ئوڭشاشنى تاللىشى مۇمكىن، يەنى ئۆزگىرىشى مۇمكىن» دېگەنلەرنى تىلغا ئالدى.
ئەنقەرەنىڭ دىپلوماتىك مارافونى
ئىران ئەتراپىدىكى جىددىيچىلىكلەرنىڭ خەلقئارا كۈنتەرتىپنىڭ ئاساسلىق تېمىسى ئىكەنلىكىنى تەكىتلىگەن تاشقى ئىشلار مىنىستىرى، رايوننىڭ يېڭى بىر توقۇنۇشنى كۆتۈرەلمەيدىغانلىقى ھەققىدە ئاگاھلاندۇرۇپ: «جۇمھۇر رەئىسىمىز رەجەپ تاييىپ ئەردوغانمۇ بۇ مەسىلىگە ئىنتايىن سەزگۈر قارىماقتا. شۇڭا، بىز يۈز بېرىش ئېھتىماللىقى بولغان بىر ئۇرۇشنىڭ ئالدىنى ئېلىش ئۈچۈن بارلىق ئىمكانىيەتلەرنى ئىشقا سېلىشنى خالايمىز» دېدى.
خاقان فىدان ئىران تاشقى ئىشلار مىنىستىرى ئابباس ئاراقچىنىڭ ئۆزىگە مۇزاكىرىلەر ھەققىدە ئۇچۇر بەرگەنلىكىنى ۋە ئەنقەرەنىڭ ئامېرىكا تەرەپ بىلەنمۇ ئالاقىلەرنى داۋاملاشتۇرۇۋاتقانلىقىنى تىلغا ئالدى. ۋەزىيەتنى «تېز سۈرئەتتە ھەل قىلىشنىڭ قىيىن» ئىكەنلىكىنى ئەسكەرتكەن مىنىستىر، شۇنداقتىمۇ تەرەپلەر ئارىسىدا سۆھبەتنى داۋاملاشتۇرۇش جەھەتتە ئېنىق بىر ئىستەك بارلىقىنى تەكىتلىدى.
ئۇ «تېخىمۇ ئىجادىي ھەل قىلىش چارىلىرى» تېپىش توغرىسىدىكى چاقىرىقلارنىڭ بارغانسېرى دىققەت قوزغاۋاتقانلىقىنى بىلدۈرۈپ، «ئۇرۇش تەھدىتى»دىن يىراقلىشىشنىڭ زۆرۈرلۈكىنى قەيت قىلدى. ئۇ: «نۆۋەتتە كەم دېگەندە تۇيۇقسىز بىر ئۇرۇش تەھدىتى يوقتەك كۆرۈنىدۇ» دەپ، مۇزاكىرىلەر ئۈچۈن پۇرسەت ئىشىكىنىڭ ئېچىلغانلىقىنى تەكىتلىدى.
