ئىران تاشقى ئىشلار مىنىستىرى شىۋېيتسارىيەدىكى يېڭى دىپلوماتىك ئۆزگىرىشلەرنى خۇشاللىنارلىق ئەھۋال دەپ باھالىدى ھەمدە مۇرەسسەچى دۆلەتلەر پاكىستان بىلەن قاتارنىڭ رايوننى مۇقىملاشتۇرۇش تىرىشچانلىقلىرى دائىرىسىدە لىۋان ئۈچۈن يېڭى بىر ئۇرۇش توختىتىش مېخانىزمىنىڭ قۇرۇلغانلىقىنى بىلدۈردى.
مۇرەسسەچىلەرنىڭ بەرگەن باياناتىغا قارىغاندا، تېھراننىڭ ھورمۇز بوغۇزىنى قايتىدىن تاقىغانلىقىنى جاكارلىشى ۋە ئامېرىكا پىرېزىدېنتى دونالد ترامپنىڭ ئىرانغا قارىتىلغان ھۇجۇملارنى قايتىدىن باشلاش تەھدىتىنى تەكرارلىشى بىلەن دەرھال باشلانغان شىۋېيتسارىيەدىكى ئامېرىكا ۋە ئىران يۇقىرى دەرىجىلىك ئەمەلدارلىرى ئوتتۇرىسىدىكى سۆھبەتنىڭ بىرىنچى باسقۇچى ئاخىرلاشقان.
مۇرەسسەچىلىك قىلىۋاتقان قاتار بىلەن پاكىستاننىڭ ئېلان قىلغان قوشما باياناتىدا، ئامېرىكا بىلەن ئىراننىڭ 60 كۈن ئىچىدە ھەل قىلغۇچ بىر كېلىشىم ھاسىل قىلىشنى مەقسەت قىلغان يول خەرىتىسى ئۈستىدە بىردەكلىك ھاسىل قىلغانلىقى قەيت قىلىندى. قاتار تاشقى ئىشلار مىنىستىرلىقى تەرىپىدىن ئېلان قىلغان باياناتقا قارىغاندا، تېخنىكىلىق سۆھبەتلەر ھەپتە بويى قاتارنىڭ شىۋېيتسارىيەدىكى تاغلىق ئارام ئېلىش رايونى بۇرگېنستوكتا داۋاملىشىدىكەن.
باياناتتا، تەرەپلەرنىڭ لىۋاندىكى توقۇنۇشلارنى ئاخىرلاشتۇرىدىغان بىر مېخانىزم ئۈستىدە كېلىشكەنلىكى ۋە سودا پاراخوتلىرىنىڭ تالاش-تارتىشلىق بوغۇزدىن بىخەتەر ئۆتۈشىگە كاپالەتلىك قىلىشقا ياردەم بېرىدىغان بىر ئالاقە لىنىيەسىنى ئاچقانلىقى بىلدۈرۈلدى.
ئىران تاشقى ئىشلار مىنىستىرى ئابباس ئاراقچى ئاممىۋى ئورتاقلىشىش تور بېتى تېلېگرام سەھىپىسدە ئېلان قىلغان باياناتىدا، دۆلىتىنىڭ نېفىت ۋە نېفىت خىمىيە مەھسۇلاتلىرى ئېكسپورتى ئۈچۈن ئېتىبارلارغا ئېرىشكەنلىكىنى، توڭلىتىپ قويۇلغان بىر قىسىم مال-مۈلۈكلىرىنىڭ ئەركىن قويۇپ بېرىلگەنلىكىنى ۋە ئىران ئۈچۈن قايتا قۇرۇش ھەم تەرەققىيات پىلانىنىڭ باشلانغانلىقىنى بىلدۈردى.
ئاقساراي سۆھبەتنىڭ ھازىرچە ئاخىرلاشقان-ئاخىرلاشمىغانلىقى توغرىسىدىكى سوئاللارغا جاۋاب قايتۇرمىدى.
ئىراننىڭ يېرىم رەسمىي تەسمىم خەۋەر ئاگېنتلىقىنىڭ بىلدۈرۈشىچە، ئىران تەرەپ يادرو مەسىلىسىگە ئالاقىدار سۆھبەتلەرنىڭ باشلىنىشى ئۈچۈن، توڭلىتىپ قويۇلغان مال-مۈلۈكلەرنى ئەركىن قويۇپ بېرىش ۋە ئىراننىڭ نېفىت ئېكسپورتىغا رۇخسەت قىلىدىغان ئامېرىكا ئېتىبارلىرىنى ئۆز ئىچىگە ئالغان كېلىشىم لايىھەسىنىڭ باشقا ماددىلىرىنىڭ ئەمەلىيلىشىشى كېرەكلىكىنى ئوتتۇرىغا قويغان.
يەنە بىر تەرەپتىن، ئاراقچى دۈشەنبە كۈنى ئەتىگەن تەرەپلەردە بەرگەن باياناتىدا، پاكىستان بىلەن قاتارنىڭ مۇرەسسەچىلىكىدە شىۋېيتسارىيەدە ئامېرىكا قوشما ئىشتاتلىرى بىلەن ئۆتكۈزۈلگەن سۆھبەتلەرنىڭ لىۋاندىكى ئۇرۇشنى ئاخىرلاشتۇرۇش ۋە ئىران ئىقتىسادىغا قىلىنىۋاتقان بېسىمنى يېنىكلىتىش يۆنىلىشىدە مۇھىم ئىلگىرىلەشلەرنىڭ قولغا كەلتۈرۈلگەنلىكىنى ئېيتتى.
