لىۋاننىڭ ھىزبۇللاھ گۇرۇھى پەيشەنبە كۈنى ئېلان قىلغان باياناتىدا، ئىسرائىلىيەنىڭ شىمالىدا ۋە چېگرا رايونلىرىدا ئىسرائىلىيە ئەسكەرلىرىنى ۋە ئۇل ئەسلىھەلىرىنى نىشان قىلغان بىر يۈرۈش باشقۇرۇلىدىغان بومبا ۋە مىناميوت ھۇجۇملىرى ئېلىپ بارغانلىقىنى ئۇقتۇردى.

ئايرىم-ئايرىم ئېلان قىلىنغان باياناتلاردا، ئىشغالىيەت ئاستىدىكى ھايفا شەھىرىنىڭ شەرقىدىكى كىرىيات ئاتا رايونىدىكى ئۇل ئەسلىھەلەرگە باشقۇرۇلىدىغان بومبا ھۇجۇمى قىلىنغانلىقى قەيت قىلىندى.

ھىزبۇللاھ يەنە ئىسرائىلىيەنىڭ شىمالىدىكى مەتۇلا ۋە مالكىيا ئولتۇراق رايونلىرىدا ئىسرائىلىيە ئەسكەرلىرى ۋە ئاپتوموبىللىرى توپلانغان نۇقتىلارنى باشقۇرۇلىدىغان بومبا بىلەن نىشان قىلغانلىقىنى بىلدۈردى. شۇنداقلا، لىۋاننىڭ جەنۇبىدىكى كانتارا يېزىسىغا يېقىن جىنجال ئېگىزلىكىدە ئىسرائىلىيە ئەسكەرلىرى ۋە ئاپتوموبىللىرىنى توپقا تۇتقانلىقىنى ئۇقتۇردى.

بۇنىڭدىن باشقا، يەنە بىر باشقۇرۇلىدىغان بومبا ھۇجۇمىنىڭ لىۋاننىڭ جەنۇبىدىكى ئايتا ئەششائاب يېزىسىغا يېقىن سەدر رايونىدا ئىسرائىلىيە ئەسكەرلىرى ۋە ئاپتوموبىللىرى توپلانغان يەرنى نىشان قىلغانلىقىنى جاكارلىدى.

كېيىنچە ھىزبۇللاھ يىرئون ۋە ئەلمالكىيە ئولتۇراق رايونلىرىدا ئىسرائىلىيە ئەسكەرلىرى توپلانغان نۇقتىلارغا راكېتامىيۇت بىلەن  ھۇجۇم قىلغانلىقىنى، پەيشەنبە كۈنى ئېلىپ بارغان ھۇجۇملىرىنىڭ سانىنىڭ 12 گە يەتكەنلىكىنى بىلدۈردى.

لىۋان گۇرۇھى يەنە ئۇچقۇچىسىز ھاۋا ئاپپاراتلىرىنىڭ ئىسرائىلىيەنىڭ شىمالىدىكى ئەۋەن مېناچېم ئولتۇراق رايونىنىمۇ نىشان قىلغانلىقىنى ئۇقتۇردى.

ئىسرائىلىيە 2-مارتتىن بۇيان لىۋاننى بومباردىمان قىلماقتا؛ شۇنداقلا لىۋاننىڭ جەنۇبىغا قارىتا قۇرۇقلۇق ھەرىكىتى ئېلىپ بارماقتا.

لىۋان دائىرىلىرى ئىسرائىلىيەنىڭ ھۇجۇملىرىدا ھازىرغىچە تەخمىنەن 1 مىڭ 318 كىشىنىڭ ھاياتىدىن ئايرىلغانلىقىنى، 3 مىڭ 935 كىشىنىڭ يارالانغانلىقىنى بىلدۈردى.