ئۇكرائىنا 170 مىليارد دوللارلىق يېڭى SAFE پىروگراممىسى ئارقىلىق ياۋروپا ئىتتىپاقىنىڭ دۆلەت مۇداپىئە پائالىيەتلىرىگە قاتنىشىدۇ.

ياۋروپا ئىتتىپاقىغا ئەزا دۆلەتلەر ئىتتىپاقنىڭ دۆلەت مۇداپىئە ساھەسىنى كۈچەيتىش مەقسىتىدە، 150 مىليارد ياۋرو (تەخمىنەن 170 مىليارد دوللار) قىممىتىدىكى دۆلەت مۇداپىئە سانائىتى تەييارلىق قەرزى فوندى (ياۋروپا ئۈچۈن بىخەتەرلىك ھەرىكىتى فوندى - SAFE) نى قۇرۇش توغرىسىدا كېلىشىم ھاسىل قىلدى. ئۇكرائىنا باش مىنىستىرى دېنىس شمىگال ئۇكرائىنانىڭ رەسمىي ھەمكارلاشقۇچى دۆلەت سۈپىتىدە قوبۇل قىلىنغانلىقىنى جاكارلىدى.

شمىگال چارشەنبە كۈنى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، بۇ قارارنىڭ ئۇكرائىنانىڭ ياۋروپا ئىتتىپاقىنىڭ ئورتاق دۆلەت مۇداپىئە تەمىناتى تىرىشچانلىقلىرىنى بىر گەۋدىلەشتۈرۈشىدە تۈرتكىلىك رول ئوينايدىغانلىقىنى ۋە ياۋروپا تەمىنات زەنجىرلىرىدە ئۇكرائىنا شىركەتلىرىگە پۇرسەت يارىتىپ بېرىدىغانلىقىنى بىلدۈردى.

ئۇ، بۇنىڭ ھەم ياۋروپا ئىتتىپاقىغا ئەزا دۆلەتلەرنىڭ ھەم ئۇكرائىنانىڭ بىخەتەرلىكىنى كۈچەيتىش ئۈچۈن «مۇھىم ۋە جىددىي» تەشەببۇس ئىكەنلىكىنى تەكىتلەپ مۇنداق دېدى:

«بىز بىرلىكتە تېخىمۇ قۇدرەت تاپىمىز.»

شمىگال ياۋروپا ئىتتىپاقى كومىتېتىنىڭ رەئىسى ئۇرسۇلا ۋون دېر لېيېنغا، پولشاغا ۋە ياۋروپا ئىتتىپاقىدىكى باشقا ھەمكارلاشقۇچىلارغا داۋاملىق قوللىغانلىقى ئۈچۈن رەھمەت ئېيتتى.

ياۋروپا ئۈچۈن بىخەتەرلىك ھەرىكىتى فوندىنىڭ ياۋروپا قىتئەسىدىكى بارغانسېرى كۈچىيىۋاتقان گېئوسىياسىي جىددىيچىلىكلەر ۋە كۈنسېرى ئېشىۋاتقان بىخەتەرلىك ئېھتىياجىغا جاۋابەن، پۈتكۈل ياۋروپا ئىتتىپاقى مىقياسىدا سانائەت ئىقتىدارىنى كۈچەيتىش ئۈچۈن زور مىقداردا قەرز بېرىشى مۆلچەرلەنمەكتە.

ياۋروپا ئىتتىپاقى كومىتېتى بۇ تەشەببۇسنىڭ يولغا قويۇلۇش ۋاقىت جەدۋىلى ھەققىدە تېخىچە بايانات ئېلان قىلمىدى.