تۈركىيە جۇمھۇرىيىتى جۇمھۇر رەئىسلىك مەھكىمىسى مەبلەغ سېلىش ۋە مالىيە ئىشخانىسى ساھىبخانلىق قىلغان، سانائەت ۋە تېخنولوگىيە مىنىستىرلىقى ئىستراتېگىيەلىك ھەمكارلاشقۇچى بولغان دۇنياۋى تېخنولوگىيە پائالىيىتى GITEX ئىستانبۇلدا تۇنجى قېتىم ئۆتكۈزۈلدى.
پائالىيەتنىڭ ئېچىلىش مۇراسىمىدا سۆز قىلغان جۇمھۇر رەئىسلىك مەھكىمىسى مەبلەغ سېلىش ۋە مالىيە ئىشخانىسى ئالاقە باشقارمىسىنىڭ باشلىقى گۆكخان يۈجەل، تۈركىيەنىڭ سۈنئىي ئەقىلگە ئۆتۈش مۇساپىسىدە كۈچلۈك ئورۇنغا ئىگە ئىكەنلىكىنى تەكىتلىدى.
يۈجەل تۈركىيەنىڭ پەقەت بىر كۆۋرۈكلا ئەمەس، بەلكى دۇنيانى ئۆزئارا تۇتاشتۇرىدىغان ئىستراتېگىيەلىك تۈگۈن ئىكەنلىكىنى بىلدۈردى. ئۇنىڭ ئېيتىشىچە، كۈچلۈك سانائەت ئىقتىدارى، يۇقىرى ساپالىق ياش نوپۇسى ۋە مىڭدىن ئارتۇق سۈنئىي ئەقىل شىركىتىگە ئىگە تۈركىيە تېخنولوگىيەلىك نىشانلارنى دۇنياۋى ئىقتىسادىي قىممەتكە ئايلاندۇرۇشقا بەل باغلىغان.
GITEX نىڭ مۇئاۋىن رەئىسى بىلال ئەلرەئىسمۇ بۇ پائالىيەتنىڭ تۈركىيەنىڭ رەقەملىك يېڭىلىق يارىتىش ئۇل ئەسلىھەلىرىنى خەلقئارالىق مەبلەغ سالغۇچىلار بىلەن ئۇچراشتۇرغانلىقىنى بىلدۈردى.
ئىككى كۈن داۋاملىشىدىغان پائالىيەتكە 70 دۆلەتتىن ئىگىلىك تىكلىگۈچىلەر، مەبلەغ سالغۇچىلار ۋە تېخنولوگىيە ساھەسىنىڭ رەھبەرلىرى، 300 دىن ئارتۇق شىركەت ۋە ئىگىلىك تىكلەش كارخانىسى، 150 نەپەر دۇنياۋى نۇتۇق سۆزلىگۈچى، شۇنداقلا باشقۇرۇۋاتقان مۈلكىنىڭ ئومۇمىي قىممىتى 100 مىليارد دوللاردىن ئاشىدىغان 100 دىن ئارتۇق مەبلەغ سالغۇچى قاتناشتى.
پىروگراممىدا يەنە «Turcorn 100» دائىرىسىدىكى يەرلىك شىركەتلەر، ئالدىنقى قاتاردىكى تېخنوپاركلار ۋە خەلقئارالىق تېخنولوگىيە ماگناتلىرىمۇ ئورۇن ئالدى.
