ئامېرىكا پىرېزىدېنتى دونالد ترامپ ناتو رەھبىرى مارك رۇتتېغا، ئىرانغا قارشى ئېلىپ بېرىۋاتقان ئۇرۇشىنى قوللىمىغان ترانساتلانتىك ئىتتىپاق ئەزالىرى تەرىپىدىن «يېتىم قالدۇرۇلغانلىقى»نى ئېيتتى.

ترامپ ئاقسارايدىكى ئىشخانىسىدىكى رۇتتې بىلەن ئۆتكۈزگەن سۆھبىتى جەريانىدا: «يېتىم قالدۇرۇلدۇق. بۇ مەسىلىدە بىز جەزمەن ياردەمگە موھتاج ئەمەس ئىدۇق. ئىراننى تولۇق مەنىسىدىن ئېيتقاندا تۇنجى ھەپتىدىلا يوقاتتۇق؛ بىراق ئۇلارنىڭ <ياردەم قىلىشنى خالايمىز> دېيىشى ياخشى بىر ئىش بولاتتى» دېدى.

رۇتتې بولسا، ناتو دۆلەتلىرىنىڭ مەيدانىنى قوغداپ، ئۇرۇش جەريانىدا «ياۋروپادىكى بازىلاردىن قوزغالغان 4000 دىن 5000 غىچە ئامېرىكا ئايروپىلانى»نىڭ بولغانلىقىنى تىلغا ئالدى.

يىغىندىن كېيىن مۇخبىرلارغا سۆز قىلغان ناتو رەھبىرى، ترامپنىڭ «ئىتتىپاققا تولۇق سادىق» ئىكەنلىكىنى ۋە بىرەر ھۇجۇم ئەھۋالىدا ۋاشىنگتوننىڭ ياۋروپانى «جەزمەن» قوغدايدىغانلىقىنى تەكىتلىدى.

ئىتتىپاققا بولغان ساداقەت گۇمان ئاستىدا

ترامپنىڭ ناتوغا قاراتقان تەنقىدى، 32 ئەزا دۆلەتنىڭ رەھبەرلىرى 7-8-ئىيۇل كۈنلىرى تۈركىيەنىڭ پايتەختى ئەنقەرەدە ئۆتكۈزۈلىدىغان باشلىقلار يىغىنى ئۈچۈن بىر يەرگە جەم بولۇشىغا پەقەت ئىككى ھەپتە قالغان بىر پەيتتە ئوتتۇرىغا چىقتى.

ترامپنىڭ ئىككىنچى نۆۋەتلىك ۋەزىپە دەۋرى، گىرېنلاندىيە مەسىلىسىنىمۇ ئۆز ئىچىگە ئالغان ھالدا ناتو ئىتتىپاقداشلىرى بىلەن بولغان سۈركىلىشلەر بىلەن ئۆتتى؛ پىرېزىدېنت ھەپتىلەرچە داۋاملاشقان تەھدىتلەردىن كېيىن، يانۋار ئېيىدا بۇ قەدىمىدىن يېنىشتىن بۇرۇن، گىرېنلاندىيەنى بېسىۋېلىش بىلەن تەھدىت سالغان ئىدى.

ۋاشىنگتون يەنە دىققىتىنى خىتايغا قاراتقان بىر پەيتتە، قىتئەدىكى ناتو ئىتتىپاقداشلىرىنىڭ ئۆزلىرىنىڭ ئادەتتىكى مۇداپىئەسىنىڭ بىرىنچى دەرىجىلىك مەسئۇلىيىتىنى ئۈستىگە ئېلىشىنى خالايدىغانلىقىنى ياۋروپاغا ئاشكارا يەتكۈزدى.

بۇ مۇساپىنىڭ بىر قىسمى سۈپىتىدە، پېنتاگون ناتو ھەرىكەتلىرى ئۈچۈن ئىشلىتىشكە تەييارلىغان دۇنيا مىقياسىدىكى ھەربىي ئەسلىھە-مۈلۈك سانىنى ئازايتقانلىقىنى ئىتتىپاقداشلارغا ئاللىقاچان ئۇقتۇردى.

ئامېرىكانىڭ بۇ قەدىمى، ئىتتىپاقداش دۆلەتلەرنىڭ يەنىلا ھالقىلىق قورال سىستېمىلىرىدا ۋاشىنگتونغا بېقىنىپ قېلىۋاتقانلىقى سەۋەبىدىن، ياۋروپانى تاجاۋۇزكار بىر رۇسىيە ئالدىدا ئاجىز ئورۇنغا چۈشۈرۈپ قويىدۇ، دېگەن ئەندىشىلەرنى كۈچەيتمەكتە.