تۈركىيە جۇمھۇر رەئىس رەجەپ تاييىپ ئەردوغاننىڭ ئىمزاسى بىلەن «رەسمىي گېزىت»تە ئېلان قىلىنغان جۇمھۇر رەئىسلىك قارارنامىلىرى ئارقىلىق يېڭى ئەدلىيە ۋە ئىچكى ئىشلار مىنىستىرلىرىنى تەيىنلىدى.
مەزكۇر قارارنامىلەرگە ئاساسەن، ئىستانبۇل جۇمھۇرىيەت باش تەپتىشى ئاقىن گۈرلەك يىلماز تۇنچنىڭ ئورنىغا ئەدلىيە مىنىستىرى؛ ئەرزۇرۇم ۋالىيسى مۇستافا چىفتچى بولسا، ئەلى يەرلىكايانىڭ ئورنىغا ئىچكى ئىشلار مىنىستىرى بولۇپ تەيىنلەندى.
بۇ تەيىنلەشلەر تۈركىيە جۇمھۇرىيىتى ئاساسىي قانۇنىنىڭ 104- ۋە 106-ماددىلىرىغا ئاساسەن ئېلىپ بېرىلدى.
ئېلان قىلىنغان باياناتلاردىن كېيىن، ئەلى يەرلىكايا ئىچكى ئىشلار مىنىستىرلىقى ۋەزىپىسىنى مۇستافا چىفتچىغا ئۆتكۈزۈپ بەرگەنلىكىنى دەلىللىدى ۋە ئۇنىڭ يېڭى ۋەزىپىسىگە ئۇتۇق تىلىدى. يەرلىكايا ئىجتىمائىي تاراتقۇدا ھەمبەھرىلىگەن باياناتىدا، 2023-يىلى 4-ئىيۇندىن بىرى جۇمھۇر رەئىس ئەردوغاننىڭ تەستىقى بىلەن ئىچكى ئىشلار مىنىستىرى سۈپىتىدە ۋەزىپە ئۆتىگەنلىكىنى تىلغا ئېلىپ، ۋەزىپە ئۆتەش جەريانىدا قوللاپ-قۇۋۋەتلىگەنلىكى ئۈچۈن جۇمھۇر رەئىس ئەردوغانغا رەھمەت ئېيتتى. ئۇ يەنە ئىچكى ئىشلار مىنىستىرلىقى خادىملىرىغا ئاممىۋى تەرتىپ ۋە خەۋپسىزلىكنى قوغداشتىكى خىزمەتلىرى ئۈچۈن مىننەتدارلىق بىلدۈردى؛ ئۇ ئۇچۇرىنى ئۆزىدىن كېيىن كەلگەن مىنىستىرغا ياخشى تىلەكلەرنى تىلەش بىلەن ئاخىرلاشتۇردى.
ئاقىن گۈرلەكنىڭ ئەدلىيە مىنىستىرى بولۇپ تەيىنلىنىشىدىن كېيىن، يىلماز تۇنچمۇ خوشلىشىش ئۇچۇرى ئېلان قىلدى. تۇنچ جۇمھۇر رەئىس ئەردوغان بىلەن بىرلىكتە ۋەزىپە ئۆتەشنىڭ ۋە ھاكىمىيەت بېشىدىكى پارتىيەنىڭ سىياسەت مۇساپىسىگە تۆھپە قوشۇشنىڭ پەخىرلىك ئىش ئىكەنلىكىنى، 2023-يىلى ئىيۇندا ئەدلىيە مىنىستىرى بولۇپ تەيىنلىنىشنىڭ مۇھىم بىر مەسئۇلىيەت ئىكەنلىكىنى ئېيتتى. ئۆتكەن 23 يىلدا ئەردوغاننىڭ رەھبەرلىكىدە دېموكراتىيە ۋە قانۇننىڭ ئۈستۈنلۈكىنى كۈچەيتىش ئۈچۈن ئېلىپ بېرىلغان ئىسلاھاتلارنى تىلغا ئالغان تۇنچ، كەلگۈسىدە دۆلەت ئۈچۈن داۋاملىق خىزمەت قىلىدىغانلىقىنى ئىپادىلىدى، شۇنىڭ بىلەن بىر ۋاقىتتا گۈرلەكنى تەبرىكلەپ، يېڭى ۋەزىپىسىدە ئۇتۇق تىلىدى.
بۇ تەيىنلەشلەر «رەسمىي گېزىت»تە ئېلان قىلىنغاندىن كېيىن دەرھال يولغا قويۇلدى.
