رۇسىيە بىلەن ئۇكرائىنا دۈشەنبە كۈنى بىر كېچىدىلا ئېلىپ بېرىلغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى سەۋەبىدىن بىر-بىرىنى ئەيىبلەۋاتقان بىر پەيتتە، موسكۋا دائىرىلىرى چەتئەللىك پۇقرالارغا  ۋە دىپلوماتلارغا كىيېۋدىن ئايرىلىش چاقىرىقى ئېلان قىلدى.

رۇسىيە تاشقى ئىشلار مىنىستىرلىقى، ئۇكرائىنانىڭ پايتەختىدىكى «قارار چىقىرىش مەركەزلىرى» گە قارىتىلغان ھۇجۇملارنى پىلانلاۋاتقانلىقىنى بىلدۈرۈپ، ھەم «قارار چىقىرىش مەركەزلىرىنى ھەم كوماندانلىق نۇقتىلىرىنى» نىشانلايدىغانلىقىنى ئۇقتۇردى.

مىنىستىرلىق، دىپلوماتىك خادىملار ۋە خەلقئارالىق تەشكىلات ۋەكىللىرىنى ئۆز ئىچىگە ئالغان چەتئەل پۇقرالىرىغا كىيېۋنى «ئەڭ قىسقا ۋاقىت ئىچىدە» تاشلاپ چىقىپ كېتىش چاقىرىقىدا بولدى.

بۇ ئاگاھلاندۇرۇش، رۇسىيە دائىرىلىرىنىڭ بىر كېچىدىلا ئۇكرائىنانىڭ ئوخشىمىغان رايونلىرىغا قاراتقان ھۇجۇملىرىدا ئالتە كىشىنىڭ ئۆلگەنلىكى خەۋەر قىلىنغاندىن كېيىن ئېلان قىلىندى.

بىرىيانسىك رايونىدا ۋالىي ۋەكىلى يېگور كوۋالچۇك بېلايا بېريوزكا  يېزىسىغا قىلىنغان توپقا تۇتۇش ھۇجۇمىدا بىر كىشىنىڭ ئۆلگەنلىكىنى، بىر كىشىنىڭ يارىلانغانلىقىنى بىلدۈردى.

ھۇجۇمدا نۇرغۇن ئولتۇراق بنالارنىڭ، ئۆي ۋە ئاممىۋى ئەسلىھەلەرنىڭمۇ زىيانغا ئۇچرىغانلىقى بىلدۈرۈلدى.

ئۇچقۇچىسىز ئايروپىلان ئۇرۇشى كەسكىنلەشمەكتە

رۇسىيە كونتروللۇقىدىكى دونېتسىك رايونىدا، رۇسىيە تەرىپىدىن تەيىنلەنگەن شەھەر باشلىقى ئىۋان گورلوۋكىننىڭ ئېيتىشىچە، ئۇكرائىناغا ئائىت بىر ئۇچقۇچىسىز ئايروپىلان ھۇجۇمىدا ئىككىسى كىچىك بالا بولۇپ جەمئىي تۆت كىشى ئۆلگەن.

رۇسىيە مۇداپىئە مىنىستىرلىقى، قانۇنسىز قوشۇۋېلىنغان قىرىمنى ئۆز ئىچىگە ئالغان 14 رايون تەۋەلىكىدە ھاۋا مۇداپىئە سىستېمىلىرىنىڭ 173 ئۇچقۇچىسىز ئايروپىلاننى توسۇۋالغانلىقىنى ئېلان قىلدى.

ئۇكرائىنا باش ئىششتاب ئىدارىسى بولسا رۇسىيەنىڭ بىر كېچىدىلا 262 ئۇچقۇچىسىز ئايروپىلان قويۇپ بەرگەنلىكىنى، بۇلاردىن 246 سىنىڭ ئېتىپ چۈشۈرۈلگەنلىكىنى ياكى بىر تەرەپ قىلىنغانلىقىنى بىلدۈردى.

خاركېۋ رايونلۇق ھەربىي باشقۇرۇش ئىدارىسى باشلىقى ئولېخ سىنېخۇبوۋ، رۇسىيە كۈچلىرىنىڭ ئاخىرقى 24 سائەتتە خاركېۋ ۋە رايوندىكى 21 ئولتۇراقلىشىش نۇقتىسىغا ئۇچقۇچىسىز ئايروپىلان ھۇجۇملىرى قىلغانلىقىنى، بىرى كىچىك بالا بولۇپ 18 كىشىنىڭ يارىلانغانلىقىنى ئېيتتى.

سۇمى رايونىدا يۈز بەرگەن رۇسىيە ھۇجۇملىرىدا بولسا بىر كىشىنىڭ ئۆلگەنلىكى، تۆت كىشىنىڭ يارىلانغانلىقى ئاشكارىلاندى.

ئۇرۇش سەۋەبىدىن ئىككى تەرەپنىڭ باياناتلىرىنى مۇستەقىل ھالدا دەلىللەش مۇمكىن بولمايۋاتىدۇ.