پىرېزىدېنت دونالد ترامپ پەيشەنبە كۈنى ئاقسارايدا ئۆتكۈزۈلگەن بىر يىغىندا ھۆكۈمىتىنىڭ تاشقى سىياسەت ئۇتۇقلىرىنى تەكىتلەش بىلەن بىرگە، پارلامېنت ئەزالىرىغا ئامېرىكا قوشما ئىشتاتلىرىنىڭ خەلقئارا ئىناۋىتىنى قايتىدىن تىكلىگەنلىكىنى ۋە بىرنەچچە دۇنياۋى كىرىزىسنى پەسەيتىشكە ياردەمچى بولغانلىقىنى ئېيتتى.
ئاۋام پالاتاسى ۋە كېڭەش پالاتاسى ئەزالىرىنى بىر يەرگە جەملىگەن، ھەر ئىككى پارتىيە ئەزالىرى قاتناشقان ئەنئەنىۋى «دۆلەت مەجلىسى بالو كېچىلىكى» دە سۆز قىلغان ترامپ، ياۋروپا رەھبەرلىرىنىڭ ۋاشىنگتوندىن بارغانسېرى كۆپرەك يوليورۇق كۈتۈۋاتقانلىقىنى تىلغا ئالدى.
ترامپ پارلامېنت ئەزالىرىغا: «ياۋروپا دۆلەتلىرى پىرېزىدېنتىڭىزنىڭ خۇددى ياۋروپا دۆلەتلىرىنىڭمۇ رەھبىرى ئىكەنلىكىنى بىلدۈرۈۋاتىدۇ. ئۇلار بىزگە قۇلاق سېلىۋاتىدۇ ۋە بىزگە ئىلگىرى ھېچ بولۇپ باقمىغان دەرىجىدە ھۆرمەت بىلەن مۇئامىلە قىلىۋاتىدۇ» دېگەنلەرنى سۆزلىرىگە ئىلاۋە قىلدى.
ترامپ يەنە ئامېرىكانىڭ «سەككىز ئۇرۇشنى ھەل قىلغانلىقى»نى ئىلگىرى سۈردى.
تايلاند بىلەن كامبودژا ئوتتۇرىسىدىكى جىددىيچىلىكلەرگە دىپلوماتىك جەھەتتىن ئارىلىشىشىغا توغرا كېلىدىغانلىقىنى ئېيتقان ترامپ، «بىرنەچچە تېلېفون سۆھبىتى ئۆتكۈزىدىغانلىقى»نى ۋە «ۋەزىيەتنى قايتىدىن ئىزىغا چۈشۈرىدىغانلىقى»نى بىلدۈردى.
پىرېزىدېنت ھۆكۈمىتىنىڭ دۇنيا مىقياسىدا كۈچلۈك ئالاقىلەرنى ساقلاشنى نىشان قىلىۋاتقانلىقىنى ئېيتىش بىلەن بىرگە، بەزى دۆلەتلەرنىڭ ئامېرىكا قوشما ئىشتاتلىرىدىن پايدىلىنىۋالغانلىقىنى ئىما قىلىپ: «ئىمكانقەدەر نۇرغۇن دۆلەت بىلەن ياخشى ئۆتۈشنى خالايمىز. نۇرغۇنلىرى بىزنى ئۇزۇن يىللارغىچە ئالداپ كەلدى» دېگەنلەرنى قەيت قىلدى.
