تۈركىيە تاشقى ئىشلار مىنىستىرلىقى ئىسىرائىلىيەنىڭ سۈرىيەنىڭ جەنۇبىغا قىلغان ھۇجۇمىنىڭ خەلقئارا قانۇنغا، شۇنداقلا سۈرىيەنىڭ ئىگىلىك ھوقۇقى ۋە زېمىن پۈتۈنلۈكىگە خىلاپ ئىكەنلىكىنى بىلدۈردى.

تۈركىيە ئىسرائىلىيەنىڭ سۈرىيەنىڭ جەنۇبىدىكى ھەربىي ئۇل-ئەسلىھەلەرنى نىشان قىلغان ھۇجۇمىنى ئەيىبلەپ، بۇنى «خەتەرلىك ۋەزىيەتنى تېخىمۇ كەسكىنلەشتۈرۈۋېتىدىغان ھەرىكەت» دەپ ئاتىدى.

تۈركىيە تاشقى ئىشلار مىنىستىرلىقى جۈمە (2026-يىلى 20-مارت) كۈنى ئېلان قىلغان باياناتىدا، بۇ ھۇجۇمنىڭ خەلقئارا قانۇنغا ھەمدە سۈرىيەنىڭ ئىگىلىك ھوقۇقى ۋە زېمىن پۈتۈنلۈكىگە خىلاپ ئىكەنلىكىنى تەكىتلىدى.

مىنىستىرلىق خەلقئارا جەمئىيەتنى ئىسرائىلىيەنىڭ ھۇجۇملىرىنى توختىتىش ئۈچۈن مەسئۇلىيەتنى ئۈستىگە ئېلىشقا چاقىردى ۋە 1974-يىلىدىكى «قوراللىق كۈچلەرنى ئايرىۋېتىش كېلىشىمى» نى ئىجرا قىلىشنىڭ مۇھىملىقىنى تەكىتلىدى.

باياناتتا يەنە مۇنداق دېيىلدى: «تۈركىيە ئىلگىرىكىگە ئوخشاشلا، سۈرىيەنىڭ زېمىن پۈتۈنلۈكى، بىرلىكى ۋە ئىگىلىك ھوقۇقى ئاساسىدا، دۆلەتتە ئۇزۇن مۇددەتلىك مۇقىملىق ۋە بىخەتەرلىك ئورنىتىش تىرىشچانلىقىدا سۈرىيە ھۆكۈمىتى ۋە خەلقى بىلەن بىر سەپتە تۇرۇشنى داۋاملاشتۇرىدۇ.»

ئىسرائىلىيە ئارمىيەسى سۈرىيەنىڭ جەنۇبىدىكى ھەربىي بازىلارنىڭ قوماندانلىق مەركىزى ۋە قورال-ياراغ ئامبارلىرىنى بومباردىمان قىلغانلىقىنى ئېلان قىلغان ئىدى.

سۈرىيە تاشقى ئىشلار مىنىستىرلىقىمۇ ئىسرائىلىيەنىڭ ھەربىي ئۇل-ئەسلىھەلەرگە ھۇجۇم قىلغانلىقىنى ئەيىبلىدى.

مۇناسىۋەتلىك ئۇچۇرلارTRT World - Israel says it hit Syrian army positions in country’s Sweida region