رۇسىيە ئۆز ئالدىغىلا ئۇكرائىنادا دەرھال كۈچكە ئىگە بولىدىغان ۋە 11-ماي يېرىم كېچىگىچە داۋاملىشىدىغان ئۇرۇش توختىتىش ئېلان قىلدى.
موسكۋا 11-مايغىچە ۋاقىتلىق ئۇرۇش توختىتىش ئېلان قىلدى. كىرېمىل سارىيى بولسا ئۇكرائىنا ئۇرۇش توختىتىشنى بۇزغان تەقدىردە ئۇكرائىناغا «يېتەرلىك ۋە ئۈنۈملۈك جاۋاب» قايتۇرۇلىدىغانلىقى توغرىسىدا ئاگاھلاندۇردى.
رۇسىيەنىڭ ئۆز ئالدىغىلا ئېلان قىلغان ئۇرۇش توختىتىشى رەسمىي كۈچكە ئىگە بولدى. بۇنىڭ 11-ماي يېرىم كېچىگىچە داۋاملىشىشى پىلانلانماقتا.
موسكۋا رۇسىيە دۆلەت پىرېزىدېنتى ۋلادىمىر پۇتىننىڭ قارارىغا ئاساسەن سەيشەنبە كېچىسى ئىككىنچى دۇنيا ئۇرۇشىدا ناتسىستلار گېرمانىيەسىنىڭ 1945-يىلقى مەغلۇبىيىتىنىڭ خاتىرە يىلى بولغان زەپەر كۈنىنىڭ 80 – يىللىقىنى تەبرىكلەش پائالىيەتلىرى داۋامىدا توقۇنۇشلارنىڭ ۋاقىتلىق توختىتىلىدىغانلىقىنى جاكارلىدى.
ئەمما ئۇكرائىنا پىرېزىدېنتى ۋولودىمىر زېلېنسكىي بۇ تەشەببۇسنى قوللىمىدى.
زېلېنسكىي چەت ئەل رەھبەرلىرىنى موسكۋاغا بېرىپ زەپەر كۈنىنىڭ 80 – يىللىقىنى تەبرىكلەش پائالىيەتلىرىگە قاتناشماسلىق توغرىسىدا ئاگاھلاندۇردى.
ئۇ، موسكۋانىڭ بۇ مېھمانلارنىڭ بىخەتەرلىكىگە كاپالەتلىك قىلالمايدىغانلىقىنى ئىلگىرى سۈردى.
موسكۋا بولسا بۇ باياناتلارنى «تەھدىت» دەپ ئاتىدى.
كىرېمىل سارىيى باياناتچىسى دىمىترىي پېسكوۋ ئۇكرائىنانىڭ ئۇرۇش توختىتىشنى ھەرقانداق شەكىلدە بۇزغان تەقدىردە ئۇكرائىناغا ھەربىي جەھەتتىن تېز ۋە ئۈنۈملۈك جاۋاب قايتۇرۇلىدىغانلىقى توغرىسىدا ئاگاھلاندۇردى.
