ئامېرىكا پىرېزىدېنتى دۆنالد ترامپ ئەنقەرەدە ئۆتكۈزۈلىدىغان ناتو باشلىقلار يىغىنىغا جۇمھۇر رەئىس رەجەپ تاييىپ ئەردوغانغا بولغان ھۆرمىتى سەۋەبىدىن قاتنىشىدىغانلىقىنى، ئەگەر يىغىن باشقا بىر دۆلەتتە ئۆتكۈزۈلگەن بولسا، ئېھتىمال بارماسلىقى مۇمكىنلىكىنى ئېيتتى.
چارشەنبە كۈنى ئاقسارايدا مۇخبىرلارنىڭ سوئاللىرىغا جاۋاب بەرگەن ترامپ، تۈركىيەنى ناتو ئىچىدىكى چوڭ ھەربىي كۈچلەرنىڭ بىرى دەپ سۈپەتلەپ، دۆلەتنىڭ ئىقتىدارىغا كۆپىنچە ۋاقىتلاردا سەل قارىلىدىغانلىقىنى تىلغا ئالدى. شۇنداقلا تۈركىيەنىڭ كەڭ كۆلەملىك ھەربىي جابدۇق زاپىسىغا ۋە ۋاشىنگتون بىلەن بولغان ئۇزۇن يىللىق مۇداپىئە مۇناسىۋەتلىرىگە ئىگە ئىكەنلىكىنى تەكىتلەپ مۇنداق دېدى:
«ئەگەر ناتو باشلىقلار يىغىنى تۈركىيەدە ئۆتكۈزۈلمىگەن بولسا، قاتنىشىمەن دەپ ئويلىمايتتىم. جۇمھۇر رەئىس ئەردوغانغا بولغان ھۆرمىتىم سەۋەبىدىن بارىمەن.»
ترامپ يەنە، ئەنقەرەنىڭ «F-35» تىپلىق ئۇرۇش ئايروپىلانلىرى ۋە ئايروپىلان موتورلىرىغا بولغان تەلىپى ھەققىدىكى سوئالغا جاۋاب بېرىپ، تۈركىيەنى «ناھايىتى خۇشال قىلىدىغان» بىر قەدەمنى تاشلىشىنىڭ مۇمكىنلىكىنى سۆزلىرىگە ئىلاۋە قىلدى.
تۈركىيە 7-8-ئىيۇل كۈنلىرى پايتەخت ئەنقەرەدە ئۆتكۈزۈلىدىغان ناتو باشلىقلار يىغىنىدا دۆلەت رەھبەرلىرىنى كۈتۈۋېلىشقا تەييارلىق قىلماقتا.
رۇتتې بولسا تۈركىيەنىڭ «ناھايىتى چوڭ» بىر مۇداپىئە سانائىتى ئۇل ئەسلىھەسىگە ئىگە ئىكەنلىكىنى تىلغا ئالدى.
