گېرمانىيە باش مىنىستىرى فىرىدرىخ مېرز يەر شارى خاراكتېرلىك داۋالغۇشلارغا تاقابىل تۇرۇش ئۈچۈن ياۋروپالىقلارنىڭ تېخىمۇ مۇستەقىل بولۇشى كېرەكلىكىنى تەكىتلىدى.
مېرز دۈشەنبە كۈنى فرانكفورت ئاكسىيە بازارىنىڭ ئېشبورن بازىرىدىكى يېڭى يىللىق پائالىيىتىدە سۆز قىلىپ: «ھازىر ئېھتىمال سىياسىي ئېنىقسىزلىق ۋە مۇقىمسىزلىقنىڭ ئەڭ يۇقىرى پەللىسىنى، شۇنداقلا چوڭقۇر بىر بۇرۇلۇش نۇقتىسىنى باشتىن كەچۈرۈۋاتىمىز. بۇ ئۆتمۈشتىن ئۈزۈلۈشتۇر» دېدى. ئۇ سۆزىگە ئىلاۋە قىلىپ، ياۋروپالىقلارنىڭ نۆۋەتتە «قائىدىگە ئەمەل قىلىشنىڭ ئورنىغا كۈچ دىپلوماتىيەسى يۈرگۈزىدىغان چوڭ دۆلەتلەر قايتىدىن ئوتتۇرىغا چىققان» بىر دۇنيادا ياشاۋاتقانلىقىنى بىلدۈردى.
ئۇ دۆلىتىنىڭ ياۋروپانىڭ بىرلىشىشىگە ۋە شۇ ئارقىلىق تېخىمۇ مۇستەقىل بولۇشىغا ياردەم بېرىشتە مەركىزىي رول ئوينىيالايدىغانلىقىنى تىلغا ئېلىپ: «ياۋروپالىقلار بىرلىك ۋە قەتئىيلىك بىلەن ھەرىكەت قىلساق، دۇنيادا ئۆزگىرىش يارىتالايمىز. بەزىدە ئۆزىمىزگە ئىشەنگىنىمىزدىنمۇ كۆپ ئىشلارنى ۋۇجۇدقا چىقىرىشىمىز مۇمكىن» دېدى.
«ئىگىلىك ھوقۇقلۇق، ئەركىن، تىنچ ۋە ئىقتىسادىي جەھەتتىن باياشات بىر ياۋروپا» يولىنىڭ ئوچۇق ئىكەنلىكىنى ئەسكەرتكەن مېرز، ياۋروپانىڭ ئۆزىنى قوغداش ئىقتىدارىغا ئىگە بولۇشى، ياۋروپا ئىقتىسادىنىڭ رىقابەت كۈچىنى قايتىدىن ئاشۇرۇشى ۋە تېخنىكا جەھەتتىن تېخىمۇ مۇستەقىل بولۇشى كېرەكلىكىنى تەكىتلىدى.
مېرز يەنە: «ئاتلانتىك ئوكيان ھالقىغان مۇناسىۋەتلەر ئۆزگەردى. ئەمما كونا دەۋرلەرگە بولغان سېغىنىش ياكى ئەسلىمىلەر بىزگە ياردەم قىلالمايدۇ. بۇ يەر شارى خاراكتېرلىك ئۆزگىرىش مۇساپىسىدە رول ئويناشنى خالىساق، ئىشلارنى ھازىرنىڭ ئۆزىدىلا كونترول ئاستىغا ئېلىشىمىز كېرەك» دېگەنلەرنى سۆزلىرىگە ئىلاۋە قىلدى.
