رۇسىيە بىلەن ئۇكرائىنا ئوتتۇرىسىدا جۈمە كۈنى ئىستانبۇلدا داۋاملىشىدىغان تىنچلىق سۆھبەتلىرىگە قاتنىشىدىغان ۋەكىللەر ئۆمەكلىرى بېكىتىلدى.
تۈركىيە تاشقى ئىشلار مىنىستىرى خاقان فىدان، ئامېرىكا تاشقى ئىشلار مىنىستىرى ماركو رۇبىيو، ئۇكرائىنا ۋە رۇسىيە ۋەكىللەر ئۆمەكلىرى جۈمە كۈنى بىر يەرگە جەم بولۇپ سۆھبەت ئۆتكۈزىدۇ.
سۆھبەتلەرگە تۈركىيە تاشقى ئىشلار مىنىستىرى خاقان فىدان، ئامېرىكا تاشقى ئىشلار مىنىستىرى ماركو رۇبىيو باشچىلىقىدىكى ئامېرىكا ۋەكىللەر ئۆمىكى، ئۇكرائىنا مۇداپىئە مىنىستىرى رۈستەم ئۆمېروۋ باشچىلىقىدىكى ئۇكرائىنا ۋەكىللەر ئۆمىكى ۋە رۇسىيە پىرېزىدېنتى ۋلادىمىر پۇتىننىڭ مەسلىھەتچىسى ۋلادىمىر مېدىنسكىي باشچىلىقىدىكى رۇسىيە ۋەكىللەر ئۆمىكى قاتنىشىدۇ.
ئۇكرائىنا پىرېزىدېنتى ۋولودىمىر زېلېنسكىي تىنچلىق سۆھبەتلىرىگە قاتنىشىش ئۈچۈن رەسمىي ۋەكىللەر ئۆمىكى تەشكىل قىلىش توغرىسىدا قارارنامە ئېلان قىلدى. تۈركىيە، رۇسىيە ۋە ئامېرىكا دائىرىلىرى بىلەن كۆرۈشىدىغان ئۇكرائىنا ۋەكىللەر ئۆمىكىگە دۆلەت مۇداپىئە مىنىستىرى رۈستەم ئۆمەروۋ رەھبەرلىك قىلىدۇ.
ئۇكرائىنا مۇداپىئە مىنىستىرى رۈستەم ئۆمېروۋ باشچىلىقىدىكى ۋەكىللەر ئۆمىكى مۇئاۋىن تاشقى ئىشلار مىنىستىرى سېرگىي كىسلىتسا، دۆلەت بىخەتەرلىك ئورگىنىنىڭ مۇئاۋىن باشلىقى ئولېكساندىر پوكلاد، تاشقى ئىستىخبارات ئورگىنىنىڭ مۇئاۋىن باشلىقى ئولېھ لۇھوۋسكىي، مۇئاۋىن باش ئىشتاب باشلىقى ئولېكسىي شېۋچېنكو، دۆلەت مۇداپىئە مىنىستىرلىقى ئىستىخبارات باش ئىدارىسىنىڭ مۇئاۋىن باشلىقى ۋادىم سكىبىتسكىي، ھاۋا ئارمىيەسى قوماندانلىق ئىشتابىنىڭ مۇئاۋىن باشلىقى يېۋھېنيي شىنكارېۋ، دېڭىز ئارمىيەسى قوماندانلىق ئىشتابىنىڭ مۇئاۋىن باشلىقى ئولېكساندىر دىياكوۋ، باش ئىشتاب باشقارمىسى مەركىزىي قانۇن ئىشلىرى ئورگىنىنىڭ خەلقئارا ۋە ھەربىي ھەرىكەت قانۇنى بۆلۈمىنىڭ باشلىقى ئولېكسىي مالوۋاتسكىي، باش ئىشتاب باشقارمىسى مەركىزىي قوماندانلىق ئىشتابىنىڭ يۇقىرى دەرىجىلىك پېشقەدەم ئوفىتسېرى ئولېكساندىر شېرىخوۋ، قوراللىق قىسىملار باش قوماندانىنىڭ ياردەم بېرىش بۆلۈمىنىڭ ئوفىتسېرى ھېئورھىي كۇزمىچېۋ ۋە پىرېزىدېنت مەھكىمىسى ئىشخانىسىنىڭ باش مەسلىھەتچىسى ئولېكساندىر بېۋز قاتارلىقلاردىن تەشكىل تاپىدۇ.
ۋلادىمىر مېدىنسكىي باشچىلىقىدىكى رۇسىيە ۋەكىللەر ئۆمىكى بولسا مۇئاۋىن تاشقى ئىشلار مىنىستىرى مىخائىل گالۇزىن، رۇسىيە باش ئىشتاب باشقارمىسى ئىستىخبارات باش ئىدارىسىنىڭ باشلىقى ئىگور كوستيۇكوۋ ۋە رۇسىيە مۇئاۋىن دۆلەت مۇداپىئە مىنىستىرى ئالېكساندىر فومىن قاتارلىقلاردىن تەشكىل تاپىدۇ.
رۇسىيە ۋەكىللەر ئۆمىكىدىن ئورۇن ئالغان مۇتەخەسسىسلەر ئارىسىدا يەنە، رۇسىيە باش شتاب باشقارمىسىنىڭ مۇئاۋىن باشلىقى ئالېكساندىر زورىن، رۇسىيە پىرېزىدېنتىنىڭ ئىنسانپەرۋەرلىك ئىشلىرى سىياسىتى باشقارمىسىنىڭ مۇئاۋىن باشلىقى يېۋگېنىيا پودوبرېيېۋسكايا، رۇسىيە تاشقى ئىشلار مىنىستىرلىقى مۇستەقىل دۆلەتلەر بىرلەشمە گەۋدىسىگە ئەزا دۆلەتلەر ئىككىنچى باشقارمىسىنىڭ باشلىقى ئالېكساندىر پولىشچيۇك ۋە رۇسىيە دۆلەت مۇداپىئە مىنىستىرلىقى خەلقئارا ھەربىي ھەمكارلىق ئىشلىرى باش ئىدارىسىنىڭ مۇئاۋىن باشلىقى ۋلادىمىر شېۋتسوۋ قاتارلىقلارمۇ بار.
