فىدان ئامېرىكا بىلەن ئىران ئوتتۇرىسىدىكى كېلىشىمگە قايتىشقا چاقىرىپ مۇنداق دېدى: «قاتار يەنە بۇ كىرىزىسنى ھەل قىلىش ئۈچۈن، بارلىق ئىجابىي چارە-تەدبىرلەرنى ۋە بارلىق يوللارنى ئىشلىتىپ قولىدىن كەلگەننى قىلىشقا تىرىشىۋاتىدۇ. خۇدا خالىسا، يېقىن كۈنلەردە ياخشى بىر خەۋەر ئالىمىز. تۈركىيەمۇ بۇ مەسىلىدە قاتار بىلەن يېقىن ماسلىشىپ ئىشلىمەكتە.»
قاتار بىلەن تۈركىيەنىڭ تارىخىي ۋە كۈچلۈك مۇناسىۋەتكە ئىگە ئىككى دۆلەت ئىكەنلىكىنى تەكىتلىگەن فىدان، ئىككى دۆلەت ئوتتۇرىسىدىكى ئىستراتېگىيەلىك شېرىكچىلىكنىڭ ئۇلى رەھمەتلىك قاتار ئەمىرى شەيخ ھامەد بىن خەلىفە ئال سانى دەۋرىدە تاشلانغانلىقىنى تىلغا ئالدى.
خاقان فىدان: «بىز بۈگۈنكى كۈندە، لىۋاندىن ئافغانىستانغىچە، ئافغانىستاندىن سۇدانغىچە، سۇداندىن غەززەگىچە، شۇنداقلا پەلەستىن ۋە ئىران مەسىلىلىرىگىچە بولغان نۇرغۇن تېمىلاردا تۈركىيە-قاتار ھەمكارلىقىنىڭ ئالاھىدە ئۈلگە ياراتقانلىقىنى كۆرۈۋاتىمىز، بۇ باشقىلار تەرىپىدىنمۇ ئېتىراپ قىلىنىشقا باشلىدى. ئەمەلىيەتتە، بىز ئىزچىل تەكىتلەپ كېلىۋاتقاندەك، رايوندا رىقابەتنىڭ ئورنىغا ئىجابىي بىر ھەمكارلىققا ئېھتىياج بار. قاتارمۇ بۇنىڭ ئۈچۈن جىددىي تىرىشچانلىق كۆرسەتمەكتە» دېدى.
پارس قولتۇقى رايونىدا قاتارنى ئاساس قىلغان ھالدا، سەئۇدى ئەرەبىستان، ئەرەب بىرلەشمە خەلىپىلىكى، كۇۋەيت ۋە ئوماننىڭ يېقىنقى يىللاردىن بۇيان ئىنتايىن زور ئىلگىرىلەشلەرنى قولغا كەلتۈرگەنلىكىگە ئىشارەت قىلغان فىدان، بۇ دۆلەتلەرنىڭ تەرەققىيات ۋە ئاساسىي مۇلازىمەتلەرنى يۈكسەلدۈرۈش ئارقىلىق دۇنيا ئۆلچىمىدە ئىنتايىن كۈچلۈك دۆلەت ۋە شەھەرلەرنى قۇرۇپ چىققانلىقىنى ئىپادىلىدى.
خاقان فىدان 28-فېۋرالدىن بۇيان داۋاملىشىۋاتقان ئامېرىكا-ئىران ۋەقەلىرىنىڭ رايون ئىقتىسادىغا تەسىر كۆرسەتكەنلىكىنى تىلغا ئېلىپ، بۇ كىرىزىسنىڭ كېڭىيىپ كېتىش خەۋپىنىڭ رايوندا تېخىمۇ كۆپ مەسىلىلەرنى كەلتۈرۈپ چىقىرىشى مۇمكىنلىكىنى ئەسكەرتىپ ئۆتتى.
نۆۋەتتە ئۇل ئەسلىھەلەرگە ھۇجۇملارنىڭ قىلىنىۋاتقانلىقىنى ئەسلىتىپ ئۆتكەن فىدان: «تىلىكىمىز شۇكى، ئىران بىلەن ئامېرىكا ئوتتۇرىسىدىكى كېلىشىمگە تېزدىن قايتىلسۇن. مەلۇم بولغىنىدەك، پاكىستاننىڭ مۇرەسسەچىلىك قىلىشى، شۇنداقلا قاتار ۋە تۈركىيەنىڭ ئاكتىپ تۆھپىسى بىلەن بىر كېلىشىم لايىھەسى تۈزۈلگەن ئىدى. لېكىن، كېيىنچە بىز بۇنىڭدىن يىراقلىشىپ كەتتۇق. قايتىدىن بۇنىڭغا قايتىش زۆرۈر» دېگەنلەرنى تەكىتلىدى.
تاشقى ئىشلار مىنىستىرى فىدان، قاتار زىيارىتى جەريانىدا ئېلىپ بارغان ئۇچرىشىشلىرىدا مۇشۇ تېمىلار ئۈستىدە توختالغانلىقىنى تىلغا ئېلىپ، مۇنداق دېدى:
«شۇنى خۇشاللىق بىلەن كۆرۈۋاتىمەنكى، قاتار يەنە بۇ كىرىزىسنى ھەل قىلىش ئۈچۈن بارلىق ئىجابىي ئۇسۇللارنى ۋە يوللارنى قوللىنىش ئارقىلىق قولىدىن كەلگەننى قىلىشقا تىرىشىۋاتىدۇ. خۇدا خالىسا، يېقىن كۈنلەردە ياخشى بىر خەۋەر ئالىمىز. تۈركىيەمۇ بۇ مەسىلىدە قاتار بىلەن يېقىن ماسلىشىپ ئىشلىمەكتە. قاتارنىڭ بىخەتەرلىكى ۋە تىنچلىقى، شۇنداقلا رايوننىڭ بىخەتەرلىكى ۋە مۇقىملىقى تۈركىيەنىڭمۇ مەنپەئەتىگە ئۇيغۇندۇر. شۇڭلاشقا، ھەم (پارس) قولتۇقى رايونى، ھەم باشقا ئىسلام دۆلەتلىرى بىلەن نۇرغۇن مەسىلىلەردە بولغىنىدەك، بۇ مەسىلىدىمۇ بىرلىكتە خىزمەت قىلىشنى داۋاملاشتۇرىمىز.»
