«توكيو تەيۋەن كىرىزىسىگە سەل قارىسا، ئامېرىكا بىلەن بولغان ئىتتىپاقداشلىق يىمىرىلىدۇ»
سانائې تاكائىچى تەيۋەن كىرىزىسى جەريانىدا ئامېرىكا ئارمىيەسى ھۇجۇمغا ئۇچرىغان ئەھۋال ئاستىدا ياپونىيە «ئۆيىگە قېچىپ بېرىپ ھەرىكەتكە ئۆتمىسە»، ياپونىيەنىڭ ئامېرىكا بىلەن بولغان ئىتتىپاقداشلىقىنىڭ يىمىرىلىدىغانلىقىنى بىلدۈردى.
ياپونىيە باش ۋەزىرى سانائى تاكائىچى تەيۋەندە بىر توقۇنۇش جەريانىدا ئامېرىكا ئارمىيەسى ھۇجۇمغا ئۇچرىغان ئەھۋال ئاستىدا ياپونىيە ھەرىكەتكە ئۆتمىسە، توكيو بىلەن ۋاشىنگتون ئوتتۇرىسىدىكى ئىتتىپاقداشلىقنىڭ يىمىرىلىدىغانلىقىنى ئېيتتى.
تەيۋەن كىرىزىسىگە مۇناسىۋەتلىك پەرەز قىلىنغان بىر سېنارىيەدە ياپونىيەنىڭ ئىنكاسىنى تىلغا ئالغان تاكائىچى، ئارالدا يۈز بېرىش ئېھتىمالى بولغان ھۇجۇم جەريانىدا توكيونىڭ ھەربىي جەھەتتىن ئارىلىشىشى مۇمكىنلىكىگە ئىشارەت قىلغان نويابىردىكى سۆزلىرىنى قىسمەن يۇمشاتقاندەك قىلدى.
بۇ سۆزلەر دېموكراتىك ئارالنى ئۆز زېمىنى دەپ قارايدىغان بېيجىڭنىڭ نارازىلىقىنى قوزغىدى.
فېۋرال ئېيىدا ئۆتكۈزۈلۈشى پىلانلانغان مۇددەتتىن بۇرۇنقى سايلام ھارپىسىدا، دۈشەنبە كۈنى بىر خەۋەر پىروگراممىسىدا تاكائىچىدىن نويابىر ئېيىدا قىلغان توكيونىڭ تەيۋەنگە قىلىنغۇسى ھۇجۇم جەريانىدا ھەربىي جەھەتتىن ئارىلىشىشى مۇمكىنلىكىگە ئىشارەت قىلغان باياناتلىرى سورالدى.
تاكائىچى «TV Asahi» پىروگراممىسىدا، بىر توقۇنۇش يۈز بەرگەن ئەھۋالدا ياپونىيە بىلەن ئامېرىكانىڭ ياپونىيە ۋە ئامېرىكا پۇقرالىرىنى قۇتقۇزۇش ئۈچۈن بىرلىكتە تارقاقلاشتۇرۇش ھەرىكىتى ئېلىپ بېرىشى مۇمكىنلىكىنى ئەسكەرتىپ مۇنداق دېدى:
«ئەگەر ئامېرىكا ئارمىيەسى ياپونىيە بىلەن بىرلىكتە ھەرىكەت قىلىۋاتقاندا ھۇجۇمغا ئۇچرىسا ۋە ياپونىيە ھېچقانداق ئىش قىلماي ئۆيىگە قايتىپ كەتسە، ياپونىيە-ئامېرىكا ئىتتىپاقداشلىقى يىمىرىلىدۇ.»
كۈنسېرى زورىيىۋاتقان جىددىيچىلىك
باش ۋەزىر تاكائىچى: «ئۇ يەردە ئېغىر بىر ئىش يۈز بەرسە، تەيۋەندىكى ياپونىيە ۋە ئامېرىكا پۇقرالىرىنى قۇتقۇزۇش ئۈچۈن ئۇ يەرگە بېرىشىمىزغا توغرا كېلىدۇ. بۇنداق ئەھۋالدا ياپونىيە بىلەن ئامېرىكا بىرلىكتە ھەرىكەت قىلىدىغان ئەھۋاللار كېلىپ چىقىشى مۇمكىن. قانۇن دائىرىسىدە تەھدىتكە جىددىي تاقابىل تۇرىمىز، ۋەزىيەتكە قاراپ كەڭ دائىرىلىك قەدەم تاشلايمىز» دېدى.
تاكائىچىنىڭ نويابىردىكى باياناتلىرىدىن كېيىن، خىتاي مەزكۇر دۆلەتتىكى ئاممىۋى خەۋپسىزلىكنىڭ ناچارلىشىشى ۋە خىتاي پۇقرالىرىغا قارىتىلغان جىنايى ئىشلارنى باھانە قىلىپ، پۇقرالىرىغا ياپونىيەگە ساياھەتكە بارماسلىقنى تەۋسىيە قىلدى.
بېيجىڭنىڭ يەنە توك ئاپتوموبىللاردىن تارتىپ باشقۇرۇلىدىغان بومبىلارغىچە بولغان بارلىق نەرسىلەرنى ياساشتا ناھايىتى زور ئەھمىيەتكە ئىگە بولغان سىيرەك توپا مەھسۇلاتلىرىنى ياپونىيەگە ئېكسپورت قىلىشىنى توسۇپ قويغانلىقىمۇ خەۋەر قىلىنماقتا.