ھاماس باياناتچىسى ھازەم قاسسەم ئامېرىكا ئەگەر مەھبۇسلارنىڭ ھاياتىغا ھەقىقەتەن كۆڭۈل بۆلىدىغان بولسا، ئىسرائىلىيەنى ئۇرۇش توختىتىش كېلىشىمىگە رىئايە قىلىشقا مەجبۇرلىشىنىڭ زۆرۈرلۈكىنى بىلدۈردى.
پەلەستىنلىك چەڭچىلەر غەززەدىكى ئۇرۇش توختىتىش كېلىشىمىنىڭ بۇزۇلۇش خەۋپىگە قارىماستىن، ئاخىرقى ئەسىر ئالماشتۇرۇشنى تاماملىدى. ئىسرائىلىيە تەرىپىدىن قويۇپ بېرىلگەن يۈزلىگەن پەلەستىنلىك مەھبۇس بەدىلىگە، ھاماس ئۈچ ئىسرائىلىيەلىك ئەسىرنى قويۇپ بەردى.
ئىسرائىلىيە-ئامېرىكا پۇقراسى ساگۇى دېكەل-چېن، ئىسرائىلىيە-رۇسىيە پۇقراسى ساشا ترۇپانوۋ بىلەن ئىسرائىلىيە-ئارگېنتىنا پۇقراسى يائىر ھورن مۇنبەردە باياناتلارنى ئېلان قىلغاندىن كېيىن، قىزىل كرېست جەمئىيىتىگە تاپشۇرۇلدى ۋە ئىسرائىلىيەگە قايتۇرۇپ كېلىندى. بۇ كىشىلەر 16 ئايدىن ئارتۇق ۋاقىتتىن بېرى ئەسىر تۇتۇلماقتا ئىدى.
ئارىدىن ئۇزۇن ئۆتمەي پەلەستىنلىك مەھبۇسلارنى ئېلىپ ماڭغان بىر ئاپتوبۇس، ئىسرائىلىيەنىڭ ئوفەر تۈرمىسىدىن ئايرىلدى. ئاپتوبۇس ئىشغالىيەت ئاستىدىكى غەربىي قىرغاقنىڭ راماللاھ شەھىرىدە خەلق تەرىپىدىن ھاياجان بىلەن قارشى ئېلىندى.
باشقا ئاپتوبۇسلار بولسا، نېگېۋ چۆلىدىكى بىر ئىسرائىلىيە تۈرمىسىدىن غەززە رايونىغا مەھبۇسلارنى توشۇدى.
بۇ قېتىمقى ئالماشتۇرۇش، 19-يانۋاردا ئۇرۇش توختىتىش كېلىشىمى كۈچكە ئىگە بولغاندىن بۇيان ئەمەلگە ئاشۇرۇلغان ئالتىنچى ئالماشتۇرۇش بولدى. ھاماس ئىسرائىلىيەنىڭ گۇمان قىلىنغان بۇزغۇنچىلىقلىرى سەۋەبىدىن ئەسىرلەرنى قويۇپ بېرىشنى توختىتىش توغرىسىدا، ئىسرائىلىيەمۇ ئۇرۇشنى قايتىدىن باشلاش توغرىسىدا تەھدىت سالغان ئىدى.
