كانادا باش مىنىستىرى جاستىن تىرۇدو بايانات بېرىپ، ئەگەر ئامېرىكا پىرىزىدېنتى دونالد ترامپ ھۆكۈمىتى كانادا ماللىرىغا قوشۇمچە باج قويۇش پىلانىنى ئەمەلگە ئاشۇرسا، كانادانىڭمۇ سەيشەنبە كۈنىدىن باشلاپ 107 مىليارد ئامېرىكا دوللىرى قىممىتىدىكى ئامېرىكا تاۋارلىرىغا 25 پىرسەنت قوشۇمچە باج قويىدىغانلىقىنى بىلدۈردى. بۇ جەرياندا، خىتايمۇ ئامېرىكانىڭ قوشۇمچە تاموژنا باجلىرىغا تاقابىل تۇرۇش چارىلىرىنى قوللىنىدىغانلىقىنى جاكارلىدى.

تىرۇدو دۈشەنبە كۈنىدىكى باياناتىدا، كانادانىڭ سەيشەنبە كۈنىدىن باشلاپ 20 مىليارد ئامېرىكا دوللىرى قىممىتىدىكى ئامېرىكا ماللىرىغا 25 پىرسەنت باج قويىدىغانلىقىنى، قالغان 87 مىليارد قىممىتىدىكى ماللارغا بولسا 21 كۈن ئىچىدە باج قويۇلىدىغانلىقىنى ئېيتتى.

تىرۇدو: «بىزنىڭ باجلىرىمىز ئامېرىكا سودا ھەرىكىتىنى توختاتمىغىچە كۈچكە ئىگە بولىدۇ. ئەگەر ئامېرىكا باجلىرى توختىمايدىغان بولسا، بىز ئۆلكىلەر ۋە رايونلار بىلەن بىرلىكتە باجسىز چارا تەدبىرلەرنى قوللىنىشنى مۇزاكىرە قىلىۋاتىمىز» دېدى.

خىتاينىڭ تاقابىل تۇرۇش چارىلىرى

خىتاي سودا مىنىستىرلىقى سەيشەنبە كۈنى بايانات ئېلان قىلىپ، ئامېرىكانىڭ فېنتانىل ۋە باشقا مەسىلىلەرنى ئىلگىرى سۈرۈپ خىتاي ماللىرىغا قوشۇمچە باج قويۇش قارارىغا قارشى ئىكەنلىكىنى بىلدۈرۈپ، بۇ قارارلارغا تاقابىل تۇرۇش چارىلىرىنى قوللىنىدىغانلىقىنى، بۇ چارە-تەدبىرلەرنىڭ خىتاينىڭ ھوقۇق ۋە مەنپەئەتلىرىنى قوغداشنى مەقسەت قىلىدىغانلىقىنى تەكىتلىدى.

مىنىستىرلىق باياناتىدا، ئامېرىكانىڭ ئۆزىنىڭ فېنتانىلغا مۇناسىۋەتلىك مەسىلىلىرىنى خىتايغا يۈكلەپ، بۇنى قوشۇمچە تاموژنا بېجى قويۇشقا باھانە قىلىۋاتقانلىقىنى ئىلگىرى سۈردى.

ئامېرىكا خىتاينىڭ فېنتانىل ئىشلەپچىقىرىشتا ئىشلىتىلىدىغان خىمىيەلىك ماددىلار بىلەن تەمىنلەيدىغانلىقىنى تەلەپ قىلغان بولسىمۇ، خىتاي بۇنى رەت قىلغانىدى.

مىنىستىرلىق ئامېرىكانى «ئاساسسىز» بولغان بۇ يەككە تەرەپلىك تاموژنا بېجى قويۇش قارارلىرىنى «دەرھال توختىتىشقا» چاقىرغانىدى.