ئامېرىكا پىرېزىدېنتى دونالد ترامپ دۆلىتىنىڭ تۈركىيەگە «F-35» تىپلىق ئۇرۇش ئايروپىلانلىرىنى سېتىپ بېرىشىگە ئىسرائىلىيە باش مىنىستىرى بېنيامىن نېتانياھۇنىڭ قارشى چىقىشىغا قارىتا: «ھېچكىم ماڭا كىمگە نېمىنى سېتىپ-ساتماسلىقىم كېرەكلىكىنى ئېيتالمايدۇ. تۈركىيە بىزنىڭ ناھايىتى مۇھىم ئىتتىپاقدىشىمىز» دەپ بايانات بەردى.
دونالد ترامپ پايتەخت ۋاشىنگتوندىن مىچىگانغا كېتىۋاتقاندا، ئايروپىلاندا ئاخبارات ۋاسىتىلىرىنىڭ كۈنتەرتىپكە مۇناسىۋەتلىك سوئاللىرىغا جاۋاب بەردى.
ترامپ بىر مۇخبىرنىڭ، ئىسرائىلىيە باش مىنىستىرى نېتانياھۇنىڭ تۈركىيەگە «F-35» تىپلىق ئۇرۇش ئايروپىلانلىرىنىڭ سېتىلىشىغا قارشى چىققانلىقى ھەققىدىكى سوئالىغا جاۋاب بېرىپ مۇنداق دېدى:
«تۈركىيە مەن ئۈچۈن ناھايىتى مۇھىم بىر ئىتتىپاقداش بولۇپ كەلدى. جۇمھۇر رەئىس رەجەپ تاييىپ ئەردوغان مېنىڭ دوستۇمدۇر. ھېچكىم ماڭا كىمگە نېمىنى سېتىپ-ساتماسلىقىم كېرەكلىكىنى ئېيتالمايدۇ. تۈركىيە بىزنىڭ ناھايىتى مۇھىم ئىتتىپاقدىشىمىزدۇر.»
تۈركىيە بىلەن ئىسرائىلىيە ئوتتۇرىسىدىكى مەسىلىلەرنىڭ ھەممىگە ئايان ئىكەنلىكىنى تىلغا ئالغان ترامپ، (ناتو باشلىقلار يىغىنى مۇناسىۋىتى بىلەن ئېلىپ بارغان) ئەنقەرە زىيارىتىنىڭ ئىنتايىن ياخشى ئۆتكەنلىكىنى بىلدۈرۈپ: «تۈركىيە ئادەتتىن تاشقىرى دەرىجىدە مۇھىم ۋە ئىنتايىن كۈچلۈك بىر دۆلەت. ئۇلارنىڭ قالتىس ئارمىيەسى بار، ئىنتايىن چوڭ ۋە كۈچلۈك بىر ئارمىيە. ئۇلار نۇرغۇنلىغان ئېسىل قورال-ياراغلارغا ئىگە» دېدى.
