ئامېرىكا پىرېزىدېنتى دونالد ترامپ بۈگۈن (2026-يىلى 28-فېۋرال) ئامېرىكا ئارمىيەسىنىڭ ئىراندا «زور كۆلەملىك جەڭ» نى باشلىغانلىقىنى بىلدۈرۈپ، ئامېرىكا تەرەپتىنمۇ تالاپەت كۆرۈلۈش ئېھتىماللىقى بارلىقىنى ئاگاھلاندۇردى.

ترامپنىڭ ئېيتىشىچە، بۇ قېتىملىق زەربە بېرىش ھەرىكىتى ئىراننىڭ باشقۇرۇلىدىغان بومبىلىرىنى پاچاقلاپ تاشلاش ۋە دېڭىز ئارمىيەسىنى يوقىتىشنى مەقسەت قىلغان. بۇ ھەرىكەت ئامېرىكا بىلەن ئىسرائىلىيەنىڭ «ئەگەر ئىران يادرو پىلانى ۋە باللىستىك باشقۇرۇلىدىغان بومبا پىلانىنى داۋاملاشتۇرسا، ئىرانغا يەنە زەربە بېرىمىز» دەپ كۆپ قېتىم ئاگاھلاندۇرۇش بەرگىنىدىن كېيىن ئېلىپ بېرىلدى.

ترامپ «ھەقىقىي مېديا» (Truth Social)  دا ھەمبەھرلىگەن سىنلىق نۇتقىدا: «مەن بۇ باياناتنى ئاسانلىقچە ئېلان قىلغىنىم يوق. ئىران ھاكىمىيىتى ئادەم ئۆلتۈرۈشنى مەقسەت قىلماقتا» دېدى.

ئۇ سۆزىنى داۋاملاشتۇرۇپ: «باتۇر ئامېرىكا قەھرىمانلىرى جېنىدىن ئايرىلىشى مۇمكىن، ئۇرۇشتا دائىم كۆرۈلىدىغان تالاپەتلەر يۈز بېرىشى مۇمكىن، ئەمما بىز بۇنى ھازىر ئۈچۈنلا ئەمەس، بەلكى كەلگۈسى ئۈچۈن قىلىۋاتىمىز، بۇ ئالىيجاناب ۋەزىپە» دېدى.

ترامپ ئىران قوراللىق كۈچلىرىنىڭ بىر قىسمى بولغان ئىسلام ئىنقىلابى مۇھاپىزەتچىلەر قىسىمىنىڭ ئەزالىرىنى قورال تاشلاشقا چاقىردى ۋە ئۇلارنى جازادىن كەچۈرۈم قىلىنىدىغانلىقى توغرىسىدا ۋەدە بەردى.

ترامپنىڭ سۆزىگە قارىغاندا، تەسلىم بولمىغانلارنىڭ باشقا تاللاش يولى «جەزمەن ئۆلۈم» بولىدىكەن.

ۋاشىنگتون بىلەن تېھران يېقىنقى ھەپتىلەردە ئىراننىڭ يادرو پىلانى توغرىسىدا بىر يۈرۈش ۋاستىلىق سۆھبەتلەرنى ئۆتكۈزگەن ئىدى. ئەڭ يېقىنقى سۆھبەت پەيشەنبە (2026-يىلى 26-فېۋرال) كۈنى ئۆتكۈزۈلگەن بولۇپ، ھېچقانداق كېلىشىم ھاسىل قىلىنمىغان.

پىرېزىدېنت ترامپ: «ئىران نەچچە ئون يىلدىن بېرى قىلىپ كەلگىنىدەكلا رەت قىلدى. ئۇلار يادرو پىلانىدىن ۋاز كېچىش پۇرسەتلىرىنىڭ ھەممىسىنى رەت قىلدى، بىز بۇنىڭغا ئەمدى چىداپ تۇرالمايمىز» دېدى.

مۇناسىۋەتلىك ئۇچۇرلارTRT World - The world on edge as US and Israel attack Iran