رۇسىيەنىڭ لېنىنگراد رايونىدىكى دۆلەتنىڭ ئەڭ چوڭ ئېلېكترونلۇق سودا ماگناتى «ۋايلدبېررىس» (Wildberries) نىڭ بىر ئامبىرىغا قىلىنغان ئۇچقۇچىسىز ھاۋا ئاپپاراتى ھۇجۇمى كەلتۈرۈپ چىقارغان ئوت ئاپىتىدە ئۈچ كىشى يارىلاندى. شىركەت ھۇجۇمدىن كېيىن بەزى ئەشيا ئوبوروت (لوگىستىكا) مەركەزلىرىدىكى پائالىيەتلىرىنى ۋاقىتلىق توختاتتى.
لېنىنگراد ۋالىيسى ئالېكساندر دروزدېنكو يازما بايانات ئېلان قىلىپ، ۋسېۋولويسك رايونىدىكى مەزكۇر ئامبارغا قىلىنغان ھۇجۇم نەتىجىسىدە ئوت كەتكەنلىكىنى، يارىلانغان 3 كىشىنىڭ دوختۇرخانىدا داۋالىنىۋاتقانلىقىنى بىلدۈردى.
دروزدېنكو يەنە، بىر ئۇچقۇچىسىز ھاۋا ئاپپاراتىنىڭ كىروۋ رايونىدىكى بىر ئۆي قۇشلىرى باقمىچىلىق فىرمىسىنىڭ ئامبىرىغا چۈشكەنلىكىنى، بىنادا قىسمەن تالاپەت كۆرۈلگەن بولسىمۇ، ئادەم يارىلىنىش ئەھۋالى كۆرۈلمىگەنلىكىنى قەيت قىلدى.
يېقىنقى كۈنلەردە «ۋايلدبېررىس»نىڭ ئوخشىمىغان ئەشيا ئوبوروت مەركەزلىرى ئۇدا ئۇچقۇچىسىز ھاۋا ئاپپاراتى ھۇجۇمىغا ئۇچرىماقتا.
