شاھىتلارنىڭ بىلدۈرۈشىچە، ئىسرائىلىيە دۆلەت خەۋپسىزلىك كۈچلىرى سەيشەنبە كۈنى ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدىكى راماللاھ شەھىرىنىڭ غەربىگە جايلاشقان بەيت لىقىيا يېزىسىدا ئۈچ ئۆي ۋە بىر دېھقانچىلىق قۇرۇلۇشىنى ۋەيران قىلغان بولۇپ، ۋەيران قىلىش ھەرىكەتلىرى ئۈزلۈكسىز كۆپەيمەكتە ئىكەن.

شاھىتلارنىڭ ئانادولۇ ئاگېنتلىقىغا بەرگەن باياناتىدا بىلدۈرۈشىچە، ئىسرائىلىيە ئارمىيەسى يېزىغا  توپا تۈرتۈش ماشىنىلىرى بىلەن بېسىپ كىرىپ، «رۇخسەتسىز سېلىنغان» دېگەننى باھانە قىلىپ بىنالارنى چېقىۋەتكەن.

پەلەستىن زېمىنلىرىدا رامىزاننىڭ يەتتىنچى كۈنى يۈز بەرگەن بۇ ۋەقە، ئىسرائىلىيەنىڭ مۇسۇلمانلارنىڭ روزا ئېيىنىڭ ئەھمىيىتىگە سەل قارىغانلىقىن دېرەك بېرىدىكەن.

ئىسرائىلىيە ئادەتتە قۇرۇلۇش رۇخسىتىنىڭ تولۇق ئەمەسلىكىنى باھانە قىلىپ، ئىيوردان دەرياسىنىڭ غەربىي قىرغىقىنىڭ بەزى رايونلىرىدا پەلەستىنلىكلەرنىڭ ئۆي – ماكانلىرىنى ۋە قۇرۇلۇشلىرىنى چېقىپ تاشلىماقتا ئىكەن.

رەسمىي ئورگان بولغان پەلەستىن تام ۋە كۆچمەنلەرگە قارشى تۇرۇش كومىتېتىنىڭ مەلۇماتىغا ئاساسلانغاندا، ئىسرائىلىيە يانۋار ئېيىدا 59 قېتىملىق ۋەيران قىلىش ھەرىكىتى ئېلىپ بارغان بولۇپ، بۇ جەرياندا 77 سى ئولتۇراقلىشىش ھالىتىدىكى جەمئىي 126 پەلەستىن قۇرۇلۇشى زىيانغا ئۇچرىغان. دائىرىلەر يەنە كۆپىنچىسى ئەلخەلىل ۋىلايىتىدە بولۇپ، جەمئىي 40 ۋەيران قىلىش بۇيرۇقى ئېلان قىلغان.

ئىسرائىلىيەنىڭ 2023-يىلى ئۆكتەبىر ئېيىدا غەززەگە قوزغىغان ئىرقىي قىرغىنچىلىق ئۇرۇشى بىلەن بىرلىكتە، ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدا زوراۋانلىق ھەرىكەتلىرى يامراپ كەتتى. پەلەستىننىڭ ئىستاتىستىكىلىق مەلۇماتلىرىغا ئاساسلانغاندا، ئىيوردان دەرياسىنىڭ غەربىي قىرغىقىدا 1116 دىن ئارتۇق پەلەستىنلىك ئۆلتۈرۈلگەن، تەخمىنەن 11 مىڭ 500 كىشى يارىلانغان ۋە 22 مىڭغا يېقىن كىشى تۇتقۇن قىلىنغان.

2024-يىلى ئىيۇل ئېيىدىكى ھالقىلىق بىر قاراردا، خەلقئارا ئەدلىيە سوت مەھكىمىسى ئىسرائىلىيەنىڭ پەلەستىن زېمىنكىرىدىكى ئىشغالىيىتىنى قانۇنسىز دەپ ئېلان قىلدى ھەمدە ئىسرائىلىيەدىن ئىيوردان دەرياسىنىڭ غەربىي قىرغىقى ۋە شەرقىي قۇددۇستىكى بارلىق كۆچمەنلەر رايونلىرىنى بوشىتىشنى تەلەپ قىلدى.