يەرلىك ئاخبارات ۋاسىتىلىرىنىڭ بىلدۈرۈشىچە، شەنبە كۈنى ئىشغال ئاستىدىكى ئىيوردان دەرياسىنىڭ غەربىي قىرغىقىدىكى بىر يېزىغا قىلىنغان ھۇجۇمدا، قانۇنسىز قوراللىق ئىسرائىلىيە كۆچمەنلىرى ئوق چىقىرىپ ئۈچ پەلەستىنلىكنى يارىلاندۇرغان.

يېزا ئىشلىرى كېڭىشىنىڭ باشلىقى زايىد كاۋازبەخنىڭ رەسمىي خەۋەر ئاگېنتلىقى ۋافاغا بەرگەن مەلۇماتىغا قارىغاندا، بىر گۇرۇپپا قانۇنسىز قوراللىق كۆچمەنلەر ئىسرائىلىيە ئارمىيەسىنىڭ قوغدىشى ئاستىدا ئىيوردان دەرياسىنىڭ غەربىي قىرغىقىنىڭ جەنۇبىدىكى بەيتۇللەھمەنىڭ شەرقىي جەنۇبىغا جايلاشقان ئەلمىنىيە يېزىسى ئەتراپىدىكى پۇقرالارغا ھۇجۇم قىلىپ، ئۈچ ئادەمنى يارىلاندۇرغان.

يارىلدارلار دوختۇرخانىغا ئورۇنلاشتۇرۇلغان.

كاۋازبەخنىڭ بىلدۈرۈشىچە، قانۇنسىز كۆچمەنلەر يەنە پەلەستىنلىكلەرگە ئائىت زەيتۇن دەرەخلىرىنىڭ ئارىسىدا ماللىرىنى باققان بولۇپ، بۇ ھەرىكەت «قوشنا تېررىتورىيەلەرنى بېسىۋېلىش ۋە ئاھالىلىرىنى ئۆي-ماكانلىرىدىن ئايرىشنى مەقسەت قىلغان ئىغۋاگەرچىلىك» ئىكەن.

ئۇنىڭ ئەسكەرتىشىچە، ئىسرائىلىيە ئارمىيەسى ۋەقە يۈز بەرگەندە نەق مەيداندا بولۇپ، قانۇنسىز كۆچمەنلەرنى قوغدىغان. بۇ ئەھۋال يېزا ئاھالىلىرى ئارىسىدا قورقۇنچ ۋە جىددىيچىلىكنى كۈچەيتىۋەتكەن.

بۇ ھۇجۇم، قانۇنسىز كۆچمەنلەرنىڭ نابلۇسنىڭ جەنۇبىدىكى بۇرىن يېزىسىدا زەيتۇن يىغىۋاتقان پەلەستىنلىكلەرگە ھۇجۇم قىلىپ، بىرنەچچە كىشىنى تاياق بىلەن ئۇرۇپ ئۇزۇن ئۆتمەي يۈز بەرگەن.

 قانۇنسىز كۆچمەنلەرنىڭ ھۇجۇملىرى 2020 – يىلدىن بۇيانقى ئەڭ يۇقىرى سەۋىيەگە يەتتى

 بىرلەشكەن دۆلەتلەر تەشكىلاتى ئىنسانپەرۋەرلىك ئىشلىرىنى ماسلاشتۇرۇش ئىشخانىسى (OCHA) نىڭ مەلۇماتلىرىغا قارىغاندا، ئىشغال ئاستىدىكى ئىيوردان دەرياسىنىڭ غەربىي قىرغىقىدا بۇ يىل زەيتۇن يىغىش پەسلىدە قانۇنسىز كۆچمەنلەرنىڭ ھۇجۇملىرى 2020-يىلدىن بۇيانقى ئەڭ يۇقىرى سەۋىيەگە يەتكەن.

بۇ ھۇجۇملار جەريانىدا 70 پەلەستىن يېزىسى ئۇدا 126 قېتىم ھۇجۇمغا ئۇچرىغان، 4000 دىن ئارتۇق زەيتۇن دەرىخى ۋە كۆچىتى ۋەيران قىلىنغان.

بۇ ھۇجۇملار ئادەتتە ھەر يىلى ئۆكتەبىرنىڭ ئوتتۇرىلىرى باشلىنىدىغان يىللىق زەيتۇن يىغىش پەسلىدە يۈز بېرىدىغان بولۇپ، بۇ، قانۇنسىز كۆچمەنلەرنىڭ پەلەستىنلىك دېھقانلارغا قىلىۋاتقان زوراۋانلىقىنىڭ زور دەرىجىدە ئاشقانلىقىنى كۆرسىتىدىكەن.

رەسمىي مۇستەملىكە قىلىش ۋە سېپىل كۈرىشى  كومىتېتىنىڭ بىلدۈرۈشىچە، زەيتۇن يىغىش مەزگىلىدە ئىسرائىلىيە ئارمىيەسى ۋە قانۇنسىز كۆچمەنلەرنىڭ پەلەستىنلىكلەر نىشان قىلىنغان ھۇجۇملىرى 259  غا يەتكەن.

2023-يىلى ئۆكتەبىردىن بۇيان ئىشغال ئاستىدىكى ئىيوردان دەرياسىنىڭ غەربىي قىرغىقىدا ئىسرائىلىيەنىڭ ھۇجۇملىرى كۆپىيىپ كەتكەن بولۇپ، پەلەستىن ئورگانلىرىنىڭ سانلىق مەلۇماتلىرىغا قارىغاندا، بۇ ھۇجۇملاردا 1062 دىن ئارتۇق پەلەستىنلىك ئۆلتۈرۈلگەن، 10 مىڭ 300 دىن ئارتۇق ئادەم يارىلانغان.

خەلقئارا ئەدلىيە سوت مەھكىمىسى ئالدىنقى يىلى ئىيۇل ئېيىدا چىقارغان تارىخىي قارارىدا، ئىسرائىلىيەنىڭ پەلەستىن زېمىنىنى بېسىۋېلىشىنى قانۇنسىز دەپ جاكارلاپ، ئىيوردان دەرياسىنىڭ غەربىي قىرغىقى ۋە شەرقىي قۇددۇسقا جايلاشقان بارلىق كۆچمەن يېزىلىرىنىڭ بوشىتىلىشى توغرىسىدا چاقىرىقتا بولغان ئىدى.