ئۆنجۈ كەچەلى ياۋروپا ئىتتىپاقى تەرىپىدىن 2026-يىلى 15-ئىيۇل كۈنى ئېلان قىلىنغان «ئورتاق چۈشىنىش» ھۆججىتىدىكى تۈركىيەگە قارىتىلغان ئىبارىلەر ھەققىدە يازما بايانات ئېلان قىلدى.
كەچەلى مەزكۇر ھۆججەتتىكى تۈركىيەگە مۇناسىۋەتلىك بايانلارنىڭ ئىستراتېگىيەلىك ۋە ئادالەتلىك پوزىتسىيەدىن مەھرۇم ئىكەنلىكىنى تەكىتلەپ، ياۋروپا ئىتتىپاقىنىڭ تۈركىيەنىڭ نامزاتلىق سالاھىيىتىگە سەل قارىشىنىڭ، ئىتتىپاقنىڭ ئورتاق كەلگۈسى ئىستىقبال يارىتىشتىكى ئىقتىدارسىزلىقىنىڭ بىر ئىپادىسى ئىكەنلىكىنى بىلدۈردى.
«ناتو ئەنقەرە باشلىقلار يىغىنى رېئاللىقىغا كۆلەڭگە چۈشۈرۈشكە ئۇرۇنماقتا»
ھۆججەتنىڭ ئېلان قىلىنىش ۋاقتىنىڭ دىقققەت قوزغايدىغانلىقىنى ئەسكەرتكەن كەچەلى تۆۋەندىكىلەرنى قەيت قىلدى:
«مەزكۇر ھۆججەتنىڭ، ياۋروپالىق ئىتتىپاقداشلار ناتو دائىرىسىدە كۆرۈنەرلىك قوشۇمچە مەسئۇلىيەتلەرنى ئۈستىگە ئالغان، يېڭى دەۋرنىڭ ئۇلى سېلىنغان ۋە تۈركىيەنىڭ ئورنىنىڭ تالاش - تالاشسىز ئىكەنلىكى مۇئەييەنلەشتۈرۈلگەن تارىخىي ناتو ئەنقەرە باشلىقلار يىغىنىدىن كېيىن، بۇ رېئاللىققا كۆلەڭگە چۈشۈرۈشكە ئۇرۇنىدىغان بىر ئۇسلۇب بىلەن يېزىلغانلىقى كۆرۈلمەكتە.»
شەرقىي ئاقدېڭىز ۋە قىبرىس سىگنالى
«ھۆججەتتە شەرقىي ئاقدېڭىز مەسىلىسىدە ئوتتۇرىغا قويۇلغان ئاساسسىز دەۋالار، ياۋروپا ئىتتىپاقىنىڭ بىر تەرەپلىمە قاراش ۋە بۇرمىلانغان چۈشىنىشنىڭ تەسىرىدىن قۇتۇلالمىغانلىقىنى كۆرسىتىپ بەرمەكتە. قىبرىس مەسىلىسىگە كەلسەك، ھەل قىلىش چارىسىنىڭ 2004-يىلى قىبرىس تۈرك تەرىپى قوبۇل قىلغان ب د ت ئومۇميۈزلۈك ھەل قىلىش پىلانىنى رەت قىلغان ۋە 2017-يىلىدىكى قىبرىس يىغىنىدا مۇرەسسە قىلمايدىغان پوزىتسىيە تۇتۇپ، مۇساپىنىڭ نەتىجىسىز قېلىشىغا سەۋەب بولغان قىبرىس رىم تەرىپى تەرىپىدىن توسالغۇغا ئۇچرىغانلىقىنى يەنە بىر قېتىم ئەسلىتىپ ئۆتىمىز. ياۋروپا ئىتتىپاقىنى رېئاللىققا ئۇيغۇن، ھەر ئىككى تەرەپنىڭ مەنپەئەتىگە ماس كېلىدىغان ئىستىقبال ۋە ئۇسلۇبنى قوللىنىشقا چاقىرىمىز.»
