ئىران بىلەن ئامېرىكا ئوتتۇرىسىدا پاكىستاننىڭ ۋاسىتچىلىقى بىلەن بىر كېلىشىم قېلىپىغا يېتىپ بېرىش مەقسىتىدە ئۇچۇر ئالماشتۇرۇش مۇساپىسى داۋاملاشماقتا.
ئىران تاراتقۇلىرىنىڭ جۈمە كۈنى يخەۋەر قىلىشىچە، پاكىستان ئىچكى ئىشلار مىنىستىرى مۇھسىن ناقۋى ئامېرىكا بىلەن ئىران ئوتتۇرىسىدىكى ئۇرۇشنى ئاخىرلاشتۇرۇشنى مەقسەت قىلغان تەكلىپلەرنى قايتا كۆزدىن كەچۈرۈش ئۈچۈن ئىران تاشقى ئىشلار مىنىستىرى ئابباس ئاراقچى بىلەن يەنە بىر قېتىم كۆرۈشۈش ئېلىپ بارغان.
ئىراننىڭ يېرىم رەسمىي «تەسنىم خەۋەر ئاگېنتلىقى» نىڭ مەلۇماتىغا قارىغاندا، بۇ كۆرۈشۈش تېھران بىلەن واشىنگتون ئوتتۇرىسىدىكى داۋاملىشىۋاتقان ۋاسىتىلىك ئالاقىلەرگە ئائىت تەكلىپلەرنى تەكشۈرۈشكە مەركەزلەشكەن.
پەيشەنبە كۈنى كېچىدە، ئىراننىڭ يېرىم رەسمىي «ئىسنا» (ISNA) خەۋەر ئاگېنتلىقى، ئىران بىلەن ئامېرىكا ئوتتۇرىسىدىكى ئۇچۇر ئالماشتۇرۇشنى پاكىستان ئارقىلىق داۋاملىشىۋاتقانلىقىنى، بىر قېلىپ كېلىشىمگە يېتىپ بېرىش تىرىشچانلىقلىرىنىڭ ئەۋج ئالغانلىقىنى، ئەمما بەزى پىكىر ئوخشاشماسلىقلىرىنىڭ تېخىچە ھەل قىلىنالمىغانلىقىنى خەۋەر قىلدى. ئىسنا ئاگېنتلىقىنىڭ بىلدۈرىشىچە، بۇ ھەپتە ئىچىدە ئىككىنچى قېتىم تېھرانغا بارغان ناقۋى، ئامېرىكا تەرەپنىڭ بىر ئۇچۇرىنى ئىران دائىرىلىرىگە يەتكۈزگەن.
ئىسنا ئاگېنتلىقى تىلغا ئالغان پاكىستانلىق مەنبەلەر، ئەگەر ئىككى تەرەپ تەكلىپ قىلىنغان قېلىپنى جەزملەشتۈرسە، پاكىستان ئارمىيە باش ئىشتاب باشلىقى ئاسىم مۇنىرنىڭمۇ ئىراندا زىيارەتتە بولىدىغانلىقىنى ئېيتقان.
ئىلگىرى ئانادولۇ ئاگېنتلىقى تەرىپىدىن خەۋەر قىلىنغان 14 ماددىلىق ئىران تەكلىپىگە ئاساسلانغاندا، تېھران ھۆكۈمىتى دائىملىق بىر ئۇرۇش توختىتىش تەمىنلەنگەندىن باشلاپ 30 كۈن ئىچىدە، قويۇقلاشتۇرۇلغان ئۇران مەسىلىلىرىنىمۇ ئۆز ئىچىگە ئالغان ھالدا يادرو پىلانى بىلەن مۇناسىۋەتلىك ئايرىم مۇزاكىرىلەرنىڭ ئېلىپ بېرىلىشىنى تەلەپ قىلماقتا. واشىنگتون تەرەپ بولسا، يادرو مەسىلىسىنىڭ ھەر قانداق بىر دۆلەتلىك ئۇرۇش توختىتىش كېلىشىمىدىن بۇرۇن «مۇزاكىرە قىلىنىپ ھەل قىلىنىشى» نى شەرت قىلماقتا.
ئامېرىكا بىلەن ئىسرائىلىيە، فېۋرال ئېيىدا ئىرانغا قارشى ھۇجۇملارنى باشلىغان ئىدى. تېھران بولسا ئىسرائىلىيەنى ۋە قولتۇقتىكى ئامېرىكا ئىتتىپاقداشلىرىنى نىشانلىغان ھۇجۇملار بىلەن جاۋاب قايتۇردى ھەمدە ھورمۇز بوغۇزىنى تاقىۋەتتى. پاكىستان ئارقىلىق 8-ئاپرېلدا بىر ئۇرۇش توختىتىش يولغا قويۇلغان بولسىمۇ، ئەمما ئىسلامئابادتىكى سۆھبەتلەردە دائىمىي بىر كېلىشىم ھاسىل قىلىنالمىدى. ئامېرىكا پېرىزىدېنتى دونالد ترامپ كېيىنچە ئۇرۇش توختىتىش مۇددىتىنى شەرتىسىز ئۇزارتتى. ئەمما ئىستراتېگىيەلىك دېڭىز يولى بولغان ھورمۇز بوغۇزى ئارقىلىق ئىران پورتلىرىغا بارىدىغان ياكى بۇ پورتلاردىن كېلىدىغان پاراخوتلارغا قوللىنىلغان دېڭىز قامالىنى داۋاملاشتۇردى.
