شىمالىي كورېيە دۆلەت تاراتقۇلىرىنىڭ خەۋەر قىلىشىچە، شىمالىي كورېيەنىڭ ھاكىمىيەت بېشىدىكى پارتىيەسى داۋاملىشىۋاتقان پارتىيە قۇرۇلتىيى جەريانىدا كىم جۇڭ ئۇننى قايتىدىن باش كاتىپلىققا سايلىغان.
كورېيە مەركىزى خەۋەر ئاگېنتلىقىنىڭ دۈشەنبە كۈنى ئېلان قىلغان ئۇچۇرىدا، كىمنىڭ پىيوڭياڭدا پەيشەنبە كۈنى باشلانغان كورېيە ئەمگەكچىلەر پارتىيەسىنىڭ 9-نۆۋەتلىك قۇرۇلتىيىدا قايتىدىن سايلانغانلىقىنى بىلدۈردى. ئىلگىرى سۈرۈلۈشىچە، بەش يىلدا بىر قېتىم چاقىرىلىدىغان مەزكۇر قۇرۇلتايغا 5 مىڭ پارتىيە ۋەكىلى قاتناشقان.
كورېيە مەركىزى خەۋەر ئاگېنتلىقى قۇرۇلتاينىڭ يەكشەنبە كۈنى قوبۇل قىلغان قارارىنى نەقىل كەلتۈرۈپ مۇنداق دېدى: «كورېيە ئەمگەكچىلەر پارتىيەسىنىڭ 9-نۆۋەتلىك قۇرۇلتىيى، بارلىق ۋەكىللەرنىڭ، مىليونلىغان پارتىيە ئەزالىرىنىڭ، خەلقنىڭ ۋە خەلق ئارمىيەسى خادىملىرىنىڭ كورېيە ئەمگەكچىلەر پارتىيەسىنىڭ تەرەققىياتى ۋە دۆلەتنىڭ پاراۋانلىقى يولىدىكى تەۋرەنمەس ئىرادىسى ۋە بىر تۇتاش ئارزۇسىغا ئۇيغۇن ھالدا، كىم جۇڭ ئۇننى كورېيە ئەمگەكچىلەر پارتىيەسىنىڭ باش كاتىپى قىلىپ سايلاشنى قارار قىلدى.»
پارتىيە كاتىپى رى ئىل خۋان قۇرۇلتايدىكى نۇتۇقىدا: «پەقەت كىم جۇڭ ئۇنلا ئىشلىرىمىزنىڭ ئۇلۇغ بۇرۇلۇش يۈزلىنىشىنى سەكرەش خاراكتېرلىك بىر يۆنىلىشكە باشلاپ، ئىككىلەنمەستىن سىجىل يۈكسىلىشكە يېتەكلىيەلەيدۇ» دېدى. ئۇ يەنە دۆلەتنىڭ جازالارغا مۇۋەپپەقىيەتلىك ھالدا تاقابىل تۇرۇپ، دۈشمەنلىرى ئۈچۈن «قورقۇنچلۇق» بىر كۈچكە ئايلانغانلىقىنى سۆزلىرىگە ئىلاۋە قىلدى.
يەكشەنبە كۈنىدىكى يىغىندا يەنە كورېيە ئەمگەكچىلەر پارتىيەسى مەركىزى كومىتېتىنىڭ ئەزالىرى ۋە زاپاس ئەزالىرى سايلانغان بولۇپ، سايلانغان ئەزالار ئارىسىدا كىم جۇڭ ئۇن، پاق تە سوڭ، جو يۇڭ ۋون ۋە رى ئىل خۋان قاتارلىقلار بار.
قۇرۇلتاي بىر مەزگىل يۇقىرى دەرىجىلىك ھەربىي رەھبەرلىك ۋەزىپىسىنى ئۆتىگەن 76 ياشلىق پارلامېنت باشلىقى چو ريوڭ خاي ۋە باشقا بىر قىسىم يۇقىرى دەرىجىلىك ئەمەلدارلارنى پارتىيە مەركىزى كومىتېتى ئەزالىرى تىزىملىكىدىن چىقىرىۋەتتى. بۇ ئەھۋال رەھبەرلىك قاتلىمىدىكى زور بىر نۆۋەت ئالماشتۇرۇشنىڭ سىگنالى دەپ قارالماقتا.
يەكشەنبە كۈنىدىكى يىغىندا يەنە پارتىيەنىڭ تۈزىتىش كىرگۈزۈلگەن نىزامنامىسى قوبۇل قىلىندى، ئەمما بۇ ھەقتە ھېچقانداق تەپسىلات ئاشكارىلانمىدى.
قۇرۇلتاينىڭ ئاخىرىدا پارتىيەنىڭ ئىقتىساد، مۇداپىئە ۋە دىپلوماتىيە قاتارلىق ساھەلەرنى ئۆز ئىچىگە ئالغان كەلگۈسى بەش يىللىق يېڭى سىياسەت يۆنىلىشىنى بەلگىلەيدىغان بىر قارارنىڭ قوبۇل قىلىنىشى كۈتۈلمەكتە. قۇرۇلتاي شىمالىي كورېيەدىكى ئەڭ يۇقىرى قارار چىقىرىش ئورگىنى ھېسابلىنىدۇ.
